Бүгүн саха кыыһа Соҕуруу Африкаҕа 90 км марафону сүүрүөҕэ

Бүгүн, бэс ыйын 8 күнүгэр, Соҕуруу Африкаҕа Comrades Marathon диэн  ультрамарафон 98-с төгүлүн ыытыллыаҕа. Манна Саха сирин сүүрүүгэ, марафоҥҥа Арассыыйа успуордун маастара Алена Татаринова кыттыаҕа. Бу туһунан СӨ сүүмэрдэммит хамаандаларын бэлэмниир киин иһитиннэрэр.

Алена Татаринова 90 км уһуннаах марафону сүүрүөҕэ. Бу кини сүүрэр марафоннарыттан икки төгүл уһун буолар. Спортсмен 42,1 км уһуннаах классическай марафоҥҥа Арассыыйа үрүҥ көмүс уонна боруонса призердарынан, «Белые ночи» норуоттар икки ардыларынааҕы марафон кыайыылааҕынан буолар.

Старт олохтоох бириэмэнэн 05:30 ч. саҕаланыаҕа.

Саха сириттэн бастакынан «Комрадс» марафоҥҥа 1997 с. Николай Бускаров сүүрбүтэ. Оттон 2005 с. Татьяна Жиркова 89 км уһуну 5:57:50 көрдөрүүлээх кэлэн, кыайыылааҕынан буолбута.