Бүгүн — Саха сиригэр Урбаанньыт күнэ

Бүгүн Саха сиригэр Урбаанньыт күнэ бэлиэтэнэр. Ил Дархан Айсен Николаев бу күн Горнай улууһун урбаанньытын Нюргуяна Сивцева туһунан телеграм-ханаалыгар сырдатта.

«Нюргуяна — алта оҕолоох ийэ. Кини 15 сыл иитээччинэн үлэлээн баран, кэргэнин Александры кытта урбаанньыт буоларга санаммыттар. Баҕа санааларын толороллоругар диэн бастаан социальнай хантараагы туһаммыттар.

Бу ыал дьулуурдаах уонна үлэни таптыыр буолан, итиэннэ судаарыстыбаннай өйөбүл миэрэлэрин туһанан, билигин улахан хаһаайыстыбаны тутан олорор. Быйыл кинилэр «Мин бастакы хамнаһым» пилотнай бырайыакка кыттан, улаатан эрэр 11 оҕону хамнастаан үлэлэппиттэр. Инникитини сүөһүлэрин төбөтүн элбэтэн, сылгы хаһаайыстыбатын тэринэр былааннаахтар.

Нюргуяна устуоруйата баҕа санаа туоларын көрдөрөр. Биһиги өрөспүүбүлүкэбит урбаанньыттара — күүстээх санаалаах, сөптөөх быһаарыныылары ылынар, үлэни таптыыр, Саха сирин сайдыытыгар кылааттарын киллэрэр дьон.

Бырааһынньыган эҕэрдэлиибин! Саха сирин урбаанньыттарыгар дьолу, табыллыыны, ситиһиилэри баҕарабын!» — диэн Ил Дархан суруйда.