Бүгүн, муус устар 25 күнүгэр, саха норуодунай бэйиэтэ Савва Тарасов төрөөбүтэ 90 сылын туолла.
Савва Тарасов Саха Өрөспүүбүлүкэтин Өрөгөй ырыатын (гимнин) ааптардарыттан биирдэстэрэ. 1964 сылтан ССРС Суруйааччыларын Сойууһун чилиэнэ. 1934 сыллаахха муус устар 25 күнүгэр Горнай улууһун Солоҕон нэһилиэгэр төрөөбүтэ. «Эдэр коммунист» хаһыат эрэдээктэринэн, «Хотугу сулус» сурунаал кылаабынай эрэдээктэрин солбуйааччынан, «Кыым» хаһыат эрэдээксийэтин култуураҕа отделын сэбиэдиссэйинэн үлэлээбитэ. СӨ Духуобунаска академиятын академига, РФ уонна СӨ култууратын үтүөлээх үлэһитэ, П.А. Ойуунускай аатынан судаарыстыбаннай, Ленинскэй хомсомуол бириэмийэлэрин лауреата, Өксөкүлээх Өлөксөй аатынан өрөспүүбүлүкэтээҕи бириэмийэ лауреата, «Алаш» литературнай бириэмийэ хаһаайына (Казахстаан Өрөспүүбүлүкэтэ).
Савва Тарасов хоһоонноро Саха сирин өрөспүүбүлүкэтээҕи хаһыаттарыгар уонна сурунаалларыгар элбэхтэ бэчээттэммиттэрэ. Бастакы «Таптыыр сахам тылынан» кинигэтэ 1961 сыллаахха тахсыбыта. Кини уопсайа сахалыы уонна нууччалыы тылынан хоһооннорун уонна бэйиэмэлэрин 30-тан тахса кинигэлэрэ күн сирин көрбүттэрэ. Москва куоракка нуучча тылынан «На берегах Синэ» уонна «Цветок аласа» диэн хомуурунньуктара тахсыбыттара. Ону кытта саха тылыгар Елена Исаева «Суд памяти», Сергей Островой «Мама», Уильям Шекспир «Макбет» уонна «Гамлет» трагедияларын, ону таһынан Еврипид «Медея» айымньыларын тылбаастаабыта.
Санаттахха, муус устар 27 күнүгэр, Саха Өрөспүүбүлүкэтин күнүгэр уонна Савва Тарасов төрөөбүтэ 90 сылынан Саха сирин бары улуустарынан Саха Өрөспүүбүлүкэтин Өрөгөй ырыатын толорууга флешмоб ыытыллыаҕа. Тэрээһини «Саха» НИКХ биэриитигэр көрдөрүөхтэрэ.
Савва Тарасов уонна Михаил Тимофеев тыллара, Кирилл Герасимов муусуката. Видео: «Кэскил Медиацентр».
Өрөгөй ырыата
Сахам сирэ дьоллоох тускуга
Саһарҕалыы ыҥыра ыллыыр.
Илинтэн арҕаа ол кустуга
Алмаас таас курдук сандаара сырдыыр.
Барҕа быйаҥнаах Сахам дойдута
Модун Арассыыйа киэн туттуута,
Өркөн өрөгөй тойугун туойдун,
Үүнэр үйэҕэ үрдүү туруохтун!
Үллэр үөстээх Өлүөнэ Эбэ
Өлбөт мэҥэ угуттуур уулаах.
Элбэх омукка эрчим эбэр,
Или-эйэни олохтуур уохтаах.
Ааспыт кэммит айхаллаах суола
Арчылыыр аар алгыһын биэрдэ.
Сахабыт сирэ дьоһун, дуолан
Сайдыы аартыгар түөрэҕэ түстэ.
Дьылбыт быйыл эрдэлээн иһэр буолан, сайылыктаахтар көһүүлэриттэн саҕалаан, тыа сиригэр үлэ тэтимэ биир кэм оргуйан…
Саас харалдьык саҕана тымныыны, хаары-ардаҕы билиммэккэ нуоҕайа үүнэр кэрэчээн ньургуһун сибэккини хоту сир дьоно олоххо…
Бүгүн Аан дойдуга Түмэл күнэ. Бу бэлиэ күнүнэн Емельян Ярославскай аатынан Хотугу норуоттар устуоруйаларын уонна…
Ыам ыйын 18 күнүнээҕи туругунан, Өлүөнэ өрүскэ муус барыыта Нам улууһун сиринэн-уотунан бэлиэтэнэр. Дьону Аллараа…
СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ иһитиннэрбитинэн, бүгүн Өлүөхүмэҕэ …
Сунтаар Кэмпэндээйитигэр котлованнай ньыманан элбэх кыбартыыралаах дьиэ тутуута саҕаланна. Бу туһунан улуус дьаһалтатын пресс-сулууспата иһитиннэрдэ.…