Бүгүн СӨ норуодунай артыыһа Аскалон Павлов төрөөбүт күнэ

Бүгүн, ыам ыйын 2 күнүгэр, СӨ норуодунай артыыһа, эстрада ырыаһыта Аскалон Павлов төрөөбүт күнэ.

Бэлиэтээн суруйдахха, быйыл Өрөспүүбүлүкэ күнүгэр Ил Дархан Айсен Николаев үөрүүлээх быһыыга-майгыга Саха сирин 49 олохтооҕор судаарыстыбаннай наҕараадалары туттарбыта. СӨ  норуодунай артыыһа бочуоттаах аат Ю.Е.Платонов аатынан эстрада тыйаатырын артыыһыгар Аскалон Павловка иҥэриллибитэ. Аскалон Павлов  чахчы даҕаны норуот таптыыр, сүгүрүйэр артыыһа. Саха эстрадатыгар 30-тан тахса сыл бэриниилээхтик үлэлиир. Кини айар үлэтэ, дириҥ ис хоһоонноох ырыалара үгүс саха дьонун кутун туппуттара. Саха Өрөспүүбүлүкэтин норуодунай артыыһа Аскалон Николаевиһы бочуоттаах аатынан уонна төрөөбүт күнүнэн эҕэрдэлиибит! Бу туһунан кини санаатын маннык үллэһиннэ:

— Бүгүн төрөөбүт күммүнэн эрэ буолбакка, норуодунай артыыс буолбуппунан эмиэ олус элбэх эҕэрдэни туттум. Мин элбэх оҕолоох дьиэ кэргэҥҥэ төрөөбүт киһибин. Элбэх оҕону ийэбит соҕотоҕун киһи-хара гынан иитэн таһаарбыта. Оҕо сааспыттан төрөөбүт күнү улаханнык бэлиэтиирбитин өйдөөбөппүн. Саха киһитин сиэринэн төрөөбүт күммүн сэмэйдик, дьиэ кэргэн иһинэн эрэ бэлиэтиэхпин сөп. Оҕолорум кыралар, онон быйыл сааскы куска тахсыбатым.

Аскалон Павловтыын кэпсэтиини сиһилии манна ааҕыҥ:

Аскалон Павлов: «Олорбут олохпуттан кэмсиммэппин»