Салгыы
Бүгүн — сиэстэрэ Аан дойдутааҕы күнэ

Бүгүн — сиэстэрэ Аан дойдутааҕы күнэ

12.05.2024, 09:30
Хаартыска: балыыһа пресс-сулууспата
Бөлөххө киир:

Биһиги дойдубутугар 1996 сылтан Мэдиссиинэ сиэстэрэтин Аан дойдутааҕы күнэ бэлиэтэнэр. Бу бырааһынньык мэдиссиинэ орто сүһүөх үлэһиттэрин, ол иһигэр сиэстэрэлэри, биэлсэрдэри, акушердары, лабораннары түмэр, сомоҕолуур.

Любовь Нестерова Уус Алдан улууһун Г.Г.Никифоров аатынан Оройуоннааҕы киин балыыһаҕа кылаабынай сиэстэрэнэн үлэлиир.
Кини  2009 сылтан хирургия отделениетыгар интенсивнай терапия балаататыгар анестезистка- сиэстэрэнэн үлэлээн баран, 2014 сыллаахха кылаабынай сиэстэрэнэн анаммыта.
Кинини ийэтин суолунан барбыт киһи диэн этиэххэ сөп. Ийэтэ Любовь Алексеевна Гоголева Мэҥэ Хаҥалас улууһун Балыктааҕар 40-тан тахса сыл биэлсэринэн үлэлээбитэ. Ийэтэ: «Эйиэхэ сиэстэрэ идэтэ олус барсыа этэ», – диэн сүбэлээн, кыыһа Люба 1995 сыллаахха Жатайдааҕы мэдиссиинэ кэллиэһин бүтэрбитэ.

Любовь НЕСТЕРОВА:
«Сиэстэрэ идэтин олус сөбүлүүбүн. Сиэстэрэ үлэтэ кэккэ хаачыстыбалары эрэйэр. Кини, бастатан туран, аһыныгас санаалаах, ыарыһахха эйэҕэс сыһыаннаах буолуохтаах. Сүрүнэ, хайа да кэмҥэ дьоҥҥо көмөлөһөргө бэлэм буолуохтаах.
Улуустааҕы балыыһабытыгар кылаабынай сиэстэрэ буоларым быһыытынан, күннээҕи үлэм ылыллыбыт былаантан тутулуктаах. Хас биирдии анал үөрэхтээх сиэстэрэ, биэлсэр, акушерка эбээһинэстэрин бириэмэтигэр төһө сөпкө толороллорун, балыыһабыт үлэтэ ирдэбилгэ төһө эппиэттиирин хонтуруоллуубут. Ону таһынан сиэстэрэлэр билиилэрин-көрүүлэрин таһымын үрдэтии, аттестацияны бары кэмигэр ааһан иһэллэрин ситиһии — кылаабынай сиэстэрэ үлэтигэр киирэр. Эмпит-томмут хааччыллыытыгар, туох баар тэрээһиннэри ыытааһыҥҥа төһүү күүс буолабыт.
Бар дьоммут барахсаттар «Сиэстэрэ — быраас уҥа илиитэ» диэн этэллэрэ сөптөөх дии саныыбын. Тоҕо диэтэххэ, хас биирдии сиэстэрэ бырааһы кытта тэҥҥэ үлэлиир. Кини быраас анаабыт эмтээһинин чопчу тутуһар. Ыарыһах хайдах көрүллэн-истиллэн, эмтэнэн түргэнник үтүөрэрэ сиэстэрэттэн улахан тутулуктаах. Онон ити этиигэ сөпсөһөбүн.
Биһиги балыыһабыт сиэстэрэлэрэ, эмиэ ыарыһахтар уонна эмтэнээччилэр этэллэринии, сымнаҕас илиилээхтэр. Ол эбэтэр, сымнаҕас илиилээх сиэстэрэ диэн идэтин толору баһылаабыт, ыарыһахха эйэҕэстик сыһыаннаһар уонна түргэн-тарҕан туттунуулаах үлэһити ааттыыллар дии саныыбын. Ыксаллаах быһыыга-майгыга, төһө да быраас суоҕун иһин, ханнык баҕарар сиэстэрэ ыарыһах туруга чэпчиирин туһугар көмөнү хайаан да оҥорор.
Тыа да сиригэр, куоракка да сиэстэрэ үлэтэ улахан уратыта суоҕа буолуо дии саныыбын. Тоҕо диэтэххэ, биһиги оҥорор өҥөбүт барыта стандартка олоҕурар. Арай, тыа сирин сиэстэрэтин биир уратытынан кини улахан уопуттаах буолуон сөп. Холобур, хирургия да ыарыһаҕар, оҕоҕо даҕаны, төрөөрү сылдьар дьахталларга, кырдьаҕастарга, улахан да дьоҥҥо мэдиссиинэ көмөтүн оҥорор», -– диэн Любовь Семеновна сиэстэрэ үлэтин билиһиннэрэр.
Уус Алдан улууһун Оройуоннааҕы киин балыыһатыгар мэдиссиинэ үлэһитигэр барыта 215 штат көрүллэр, билигин 195 үлэһиттээх. Ол эбэтэр каадырынан хааччыллыы 90-91 бырыһыан.
Любовь Нестерова кэпсээбитинэн, улуус мэдиссиинэ анал орто үөрэхтээх үлэһиттэринэн толору хааччылларын туһугар 2022 сыллаахха Бороҕоҥҥо Дьокуускайдааҕы мэдиссиинэ кэллиэһин отделениетын арыйбыттар. Билигин манна 39 устудьуон үөрэнэр.
«Бу ыччаттарбыт үөрэхтэрин бүтэрдэхтэринэ, биһиги улуус мэдиссиинэ үлэһиттэринэн хааччыллыыбыт бырыһыана үрдүөхтээх. Ол аата улууспутугар каадырынан хааччыллыы сүүс бырыһыан буоларын ситиһиэхтээхпит.
Түгэнинэн туһанан, Сиэстэрэлэр аан дойдутааҕы күннэринэн биир идэлээхтэрбин эҕэрдэлиибин. Кинилэргэ барыларыгар чэгиэн доруобуйаны, үлэлэригэр үрдүк ситиһиини уонна ыарыһахтар махталларын баҕарабын. Сиэстэрэлэрбит күнүстэри-түүннэри үлэлииллэрин бары билэ-көрө сылдьабыт, үрдүктүк сыаналыыбыт. Үрүҥ халааттаах аанньалларбыт аҥардаас бэйэлэрин эрэ үлэлэринэн муҥурдаммакка, олус актыыбынайдар, уопсастыбаннй үлэҕэ барытыгар көхтөөхтүк кытталлар. Сиэстэрэ аан дойдутааҕы күнүгэр сыл аайы ыытыллар куонкуруска кыттаары бэлэмнэнэ сылдьаллар. Ону таһынан уопуттаах сиэстэрэлэрбит устудьуоннарбытыгар көмөлөһөллөрүттэн, бэйэлэрин билиилэрин-көрүүлэрин, үөрүйэхтэрин үллэстэ сылдьалларыттан олус үөрэбит уонна махтанабыт», – диэн Оройуоннааҕы киин балыыһа кылаабынай сиэстэрэтэ Любовь Нестерова күннэтэ алтыһар биир идэлээхтэрин эҕэрдэлиир.

+1
10
+1
0
+1
0
+1
0
+1
0
+1
0
+1
0
Бары сонуннар
Салгыы
22 июня
  • 12°C
  • Ощущается: 12°Влажность: 87% Скорость ветра: 2 м/с

Сообщить об опечатке

Текст, который будет отправлен нашим редакторам: