Бүгүн күүстээх ардах түһэрэ күүтүллэр

Бүгүн, бэс ыйын 21 күнүгэр, Саха сирин сорох оройуоннарыгар күүстээх ардах түһэрэ сабаҕаланар. Бу туһунан Cаха сиринээҕи күнү-дьылы кэтээн көрөр сулууспа иһитиннэрэр. 

Ол курдук, ардах Алдан, Нерюнгри, Хаҥалас, Горнай, Томпо оройуоннарыгар түһүөҕэ. Горнайга, Аммаҕа, Уус Маайаҕа, Алдаҥҥа, Нерюнгрига, Томпоҕо уонна Эбээн Бытантайга этиҥнээх ардах уонна сөкүүндэҕэ 15-20 миэтирэ түргэннээх тыал түһэрэ сабаҕаланар.

Онтон Арктика оройуоннарыгар быстах ардах уонна сөкүүндэҕэ 19-24 миэтирэ түргэннээх тыал кэлиэҕэ.

Дьокуускайга эмиэ быстах ардах түһэрэ күүтүллэр. Салгын температурата күнүс +17,+19°.