Бүгүн сорох улуустарга -3 кыраадыс буолара күүтүллэр

Бүгүн, кулун тутар 21 күнүгэр, Саха сирин сорох улуустарыгар -3 кыраадыс буолара күүтүллэр диэн УГМС иһитиннэрэр.

Соҕуруу сорох сирдэринэн хаар түһүөҕэ. Өлүөнэ алын тардыытынан, Бүлүүгэ, Өлүөхүмэҕэ, киин улуустар арҕаа өттүгэр кыралаан хаардыаҕа. Арҕаа, арктическай оройуоннарга сөкүүндэҕэ 9-14 миэтэрэ түргэннээх тыаллаах.

Түүн салгын температурата  -20-25°, хаар түстэҕинэ -10-15°, хотугулуу-илин -32-37°, Өлүөнэ алын тардыытынан -37-42°. Күнүс -7-12°, соҕуруулуу-арҕаа -3-8°, хотугулуу-илин -18-23°.

Дьокуускайга күнүс -9-11° кыраадыс буолара күүтүллэр.

Кулун тутар 21 күнүгэр күн түүнү кытта тэҥнэһэр, о.а. күн уһуна 12 чаас. Туллук кэлэр, кукаакы уйаланар. Тэҥкэ ойуурга суор уйатын оҥостор, бастакы сымыытын түһэрэр. Бу күнү Саха төрөөбүт күнэ дииллэр эбит. Сырдыкка тахсар туом диэни толороллор. Иһиккэ уот иитэн баран, уоту аһатан, алгыс анаан туран күнү батыһа эргийэн кэлэллэр. Уокка, дьиэ оһоҕор үс үрүҥ кылы алҕаан баран биэрэллэр.