Табаһыт — төрүт дьарык умнуллубат кэскилэ

Бүгүн, кулун тутар 2 күнүгэр, Саха сиригэр Табаһыт күнэ. Ил Дархан Айсен Николаев 2020 сыл атырдьах ыйын 9 күнүгэр төрүт олохтоох, аҕыйах ахсааннаах хотугу омуктар үгэстэрин, төрүт дьарыктарын харыстааһыҥҥа, сайыннарыыга табаһыт оруолун, табаны иитии өрөспүүбүлүкэ экэниэмикэтигэр биир улахан суолталаах салаа буоларын бэлиэтээн, кулун тутар бастакы субуотатыгар Табаһыт күнүн бэлиэтиир туһунан уурааҕы таһаарбыта.

«Табаны иитии өрөспүүбүлүкэ экэниэмикэтин сайдыытыгар сүҥкэн суолталаах салаа буолар. Бу ыйаах табаһыт үлэтин үрдэтэргэ, эдэр ыччаты тустаах идэҕэ уһуйарга, итиэннэ табаһыттар төрүт дьарыгы тарҕатар, аҕыйах ахсааннаах хотугу норуоттар култуураларын үүнэр көлүөнэҕэ тиэрдэр, үгэс буолбут олохторун уобараһын тэнитэр сүдү оруолларын сыаналыырга туһуланар», – диэн быһаарбыта Ил Дархан Айсен Николаев.

Табаһыттар — айылҕа ураты экстремальнай усулуобуйатыгар көһө сылдьан, үлэлиир-хамсыыр дьоннор. Дойду уопсастыбаннай пограничниктара, уопсастыбаннай экологтар, ирбэт тоҥу араҥаччылаачылар. Саха Өрөспүүбүлүкэтэ табаны иитиигэ Арассыыйаҕа үһүс миэстэҕэ сылдьар. 2023 сыллааҕы дааннайынан, таба ахсаана 171 тыһ. тиийбитэ, бу ааспыт 2002 сыллааҕы көрдөрүүлэри кытта тэҥнээтэххэ 5%-нан элбэх. Саамай элбэх таба ахсаана, 31 тыһ. таба, Усуйаана улууһугар баар. Оттон таба иитиинэн Саха сирин 34 улууһуттан, 20-гэр дьарыктаналлар. Маны таһынан, таба иитиининэн дьарыктанар хаһаайыстыба ахсаана 111, итиннэ 1,2 тыһ. кэриҥэ киһи үлэлиир.

Санаттахха, Саха сиригэр «Эдэр табаһыт» судаарыстыбаннай бырагыраама 2020 сылтан олоххо киирэр. Бу бырагырааманан ыстадааҕа 4 сылтан итэҕэһэ суох үлэлээбиттэр олорор дьиэ атыылаһыыга уонна туттарга 1 мөл. солк. туһаналлар .