Бүгүн тхэквондоҕа Саха сирин хамаандатыттан уон спортсмен киирсэр

Бэҕэһээ Саха сирин бастакы хамаандатыттан уон киһи киирсибитэ. Бүгүн уолаттар 73 кг диэри уонна 73 үөһэ ыйааһыҥҥа, оттон кыргыттар 44 кг, 49 кг диэри уонна 55 кг диэри ыйааһыҥҥа киирсиэхтэрэ.

Бэҕэһээ икки күннээх күрэхтэһии түмүгүнэн кыайыыаахтар биллэннэр, мэтээлинэн наҕараадаланнылар. Үс күннээх күрэхтэһиигэ сылдьыбыт дьон Узбекистан уонна Азербайджан хамаандалара күүстээхтэрин бэлиэтии көрбүт буолуохтаахтар. Спортсменнарыгар ыалдьан, хаһыытаан-ыһыытаан муус дыбарыаһы бүтүннүү ылан атыттары сөхтөрөллөр. Аны туран кыайыылаахтар былаахтарын бүрүнэн көбүөрү эргиччи сүүрэн кэлэн баран, көбүөр ортотугар тобуктуу түһэн былаахтарыгар тоҥхойо түһүүлэрэ ураты көстүү.

Узбекистаан спортсменнара икки кыһыл көмүс уонна икки үрүҥ көмүс мэтээли ыллылар. Оттон Азербайджан спортсменнара биир кыһыл, биир үрүҥ уонна икки боруонса мэтээллэри ылары ситистилэр.

Бэҕэһээҥи күн түмүгүнэн миэстэлэринэн маннык буолла.
Уолаттарга:
48 кг
1. Салимов Бехруз (Узбекистан)
2. Хатамли Ильяс (Азербайджан)
3. Мароз Владимир (Беларусь)
3. Тесин Темиржан (Казахстан)

55 кг
1. Отабеков Омадбек (Узбекистан)
2. Хойдз Степан (Беларусь)
3. Михайлов Александр (Ураллааҕы федеральный уокурук)
3. Хасанли Зийа (Азербайджан)

63 кг
1. Салимов Васиф (Азербайджан)
2. Сырыкбаев Яхонгир (Узбекистан)
3. Артеменко Андрей (Сибиирдээҕи федеральнай уокурук)
3. Болатулы Бекет (Казахстан)

Кыргыттарга:
63 кг
1. Мукшина Самира (Москва)
2. Смирнова Анастасия (Беларусь)
3. Фатима Хасанова (Азербайджан)
3. Чаплинская Олеся (Сибиирдээҕи федеральнай уокурук)

63 кг үөһэ
1. Михальчук Полина (Беларусь)
2. Ерназарова Феруза (Узбекистан)
3. Лазарева Наталья (Саха-1, Арассыыйа)
3. Жанабай Айсулу (Казахстан)

«Эллэй Боотур» муус дыбарыаһыгар сарсыардаттан тхэквондо күрэҕэ тиргиччи бара турар, көрөөччү да элбэх. Бүгүн түмүктүүр түһүмэх, кыайыылаахтар киэһэ биллиэхтэрэ. Бүгүҥҥү кыайыылаахтарга наҕараадалары киэһэ 19:00 ч. Комсомольскай болуоссакка туттарыахтара.