Бүгүн Тымныы оҕуһун бастакы муоһа сытыыланна

Саха итэҕэлинэн, сэтинньи 21 күнүгэр Тымныы оҕуһун бастакы муоһа сытыыланар диэн. Муос сэтинньи 8 күнүгэр үүммүтэ.

Бүгүҥҥүттэн Саха сиригэр тымныы күүһүрэр, оттон ахсынньы 21 күнүттэн тоһуттар тымныылар буолаллар. Бу күн Тымныы оҕуһун иккис муоһа үүнэр.

Сэтинньи 8 күнүгэр Тымныы оҕуһун бастакы муоһа үүнэр, ону кытта кыһыҥҥы күннэр саҕаланаллар.

Сэтинньи 21 күнүгэр ол муос кылааннанар, сытыыланар, тымныы күүһүрэн барар.

Ахсынньы 21 күнүгэр иккис муоһа үүнэн, дьыбар уоҕурар.

Тохсунньу 8 күнүгэр Тымныы оҕуһун иккис муоһа кылааннанар, Кириһиэнньэ дьыбара түһэр.

Тохсунньу 31 күнүгэр соҕуруу халлаан оҕото Хотой кыыл кэлэн уйатын хаардыыр. Кини чанырҕыырыттан Тымныы оҕуһа чаҕыйар, муоһун кылаана сыппыыр. Оччоҕуна дьыбар арыый аҕырымныыр.

Ол кэнниттэн олунньу 12 күнүгэр бастакы муос тостор. Аны, олунньу 24 күнүгэр иккис муос тостон, сылааспыт чугаһыаҕа.

Архыыптан.