Бүгүн Тымныы полюһугар Өймөкөөҥҥө экстремальнай марафон саҕаланна

Бүгүн, тохсунньу 16 күнүгэр, Тымныы полюһунан аатырар Өймөкөөн улууһугар аан дойдутааҕы таһымнаах улахан успуорт тэрээһинэ — «Тымныы полюһа Өймөкөөн-2026» 7-с кыһыҥҥы экстремальнай марафон саҕаланна.

Суолталаах тэрээһин аатырбыт  географ-геолог, ССРС Наукалаларын аҕадемиятын анал кэрэспэдьиэнэ Сергей Обручев салайааччылаах номоххо киирбит Индигиирдээҕи эспэдиисcийэни тэрийбитэ 100 сылыгар ананар. Чинчийээччи-учуонай Өймөкөөнү аан дойдуга саамай тымныы сиринэн — Тымныы полюһун быһыытынан арыйбыта. «Тымныы полюһа Өймөкөөн-2026» диэн ааттанар 7-с кыһыҥҥы экстремальнай марафон Ил Дархан “Олохтоох бэйэ оҥоһугун уонна туризмы сайыннарыы туһунан” стратегическай ыйааҕынан өйөнөр уонна “Туризм уонна ыалдьытымсах буолуу” национальнай бырайыак соругар сөп түбэһэр. Онон кыһыҥҥы событийнай туризм тэрээһинин ыытарын быһыытынан, Саха сиригэр туризм сайдыытыгар тымныытынан аатырар Өймөкөөн улууһа улахан кылаатын киллэрэр.

Бэҕэһээ, тохсунньу 15 күнүгэр, суолталаах тэрээһин кыттыылаахтара Томтор нэһилиэгэр “Көмүс күрүө” этнографическай комплекска сиэри-туому тутуһан, алгыс ылбыттара. 2023 сыллаахха бу манна дьон өйүгэр-санаатыгар истиҥ өйдөбүлүнэн хаалбыт Олоҥхо ыһыаҕа ыытыллыбыта.

— Алгысчыт бу үтүө сырдык тыыннаах сири араҥаччылыы турар Аал Луук Мас аттыгар уоту аһатан, элбэх киһи тоҕуоруһа мустубут чысхаан тымныылаах Өймөкөөҥҥө ыытыллар суолталаах тэрээһиҥҥэ кыттар спортсменнар ыраах айаны эрдээхтик этэҥҥэ ааһалларыгар көрдөстө.

Өймөкөөн оройуонун улууһун баһылыгын бастакы солбуйааччы Алексей Федотов марафон кыттыылаахтарын уонна ыалдьыттарын экстремальнай успуорт эйгэтин бэлиэ түгэнинэн эҕэрдэлээтэ, тэрээһини өйүүр успуонсардарга — «Баск» уонна «Саха сирин сайдыытын корпорацията», тэрийээччигэ «Саха сирин марафоннара» хампаанньаларга, «Полюс холода» уопсастыбаннай тэрилтэҕэ  махталын тиэртэ.

Сиэри-туому ыытыы кэнниттэн марафон кыттыылаахтара доруобуйаларын туругун бэрэбиэркэлэннилэр, марафон маршрутун кытта билсээри, бэлэмнэнии чэрчитинэн сүүрэн кэллилэр.

Сүүрүү бырагыраамата киэҥ: спортсменнар бүгүн 5 км, 10 км, 15 км, 21,1 км сүүрүөхтэрэ.. Сарсын, тохсунньу 17 күнүгэр,  — сүрүн марафон: 42,2 км, ультрамарафон — 50 км. Кыттааччыларга  тустаах усулуобуйа барыта тэрилиннэ: маршрут устун сылаас балааккалар турдулар, мэдиссиинэ суһал көмөтүн биригээдэлэрэ уонна Арассыыйа ЫБМ министиэристибэтин исписэлиистэрэ күнүстэри-түүннэри дьуһуурунайдыыллар, — диэн бэлиэтээтэ улуустааҕы туризм салаатын салайааччыта, сахалартан бастакынан Эверест хайаҕа ыттыбыт ааттаах-суоллаах альпинист Евгений Кривошапкин.

Онон бүгүн, тохсунньу 16 күнүгэр, марафон кыттыылаахтара аан дойдуга тымныытынан аатырар Өймөкөөн улууһугар бэйэлэрин кыахтарын бэрэбиэркэлэнэр эппиэттээх күннэрэ!