Олунньу 17 күнэ — Устудьуоннар этэрээттэрин күнэ

Сыллата олунньу  17 күнүгэр дойду үрдүнэн Арассыыйа устудьуоннарын этэрээттэрин күнэ бэлиэтэнэр.

Бу күн устудьуоннар этэрээттэригэр аҕытаассыйалыыр хампаанньа саҕаламмыт күнүнэн ааҕыллар, ол эбэтэр сайыҥҥы өттүгэр этэрээт састаабыгар саҥа доҕоттору булар уонна туһалаахтык бириэмэни атаарар, үлэлиэн баҕалаах устудьуоннар хомуура саҕаламмыта. Саха сиригэр быйыл устудьуоннар хамсааһыннара 58 сылын бэлиэтиир.

Саха сирин олохтоохторо Сэбиэскэй кэм саҕана устудьуоннар этэрээттэрэ күүскэ үөдүйэн үлэлээбитин өйдүүллэр, оттон 90-с сылларга бу хамсааһын тохтотулла сылдьыбыта. Саҥа устудьуоннар этэрээттэрин хамсааһына 2001 сыллаахха Ленскэйгэ улахан халаан кэмигэр сөргүтүллүбүтэ. Оччолорго кылгас болдьох кэм устата куораты чөлүгэр түһэриигэ үрдүк үөрэх кыһаларын устудьуоннарын этэрээттэрэ тэриллибиттэрэ.

2007 сылтан өрөспүүбүлүкэ Бүтүн Арассыыйатааҕы хамсааһынын састаабыгар киирбитэ уонна «Арассыыйатааҕы устудьуоннар этэрээттэрэ» ыччат уопсастыбаннай тэрилтэтин эрэгийиэннээҕи салаатынан буолбута.

Билигин Саха сирин устудьуоннарын этэрээттэрэ араас хайысханан үлэлииллэр. Ол курдук, тутуу, мэдииссинэ, педагогика, тыа хаһаайыстыбата, сиэрбис этэрээттэрэ бааллар.