БҮГҮН ВЛАДИМИР ПУТИН ФЕДЕРАЛЬНАЙ МУННЬАХХА ЭТИИ ОҤОРУОҔА

Бүгүн, олунньу 21 күнүгэр, Арассыыйа бэрэсидьиэнэ Федеральнай Мунньахха этии оҥоруоҕа.  Гостинай Дворга ыытыллар тэрээһин Саха сирин бириэмэтинэн 18 чааска саҕаланыаҕа.

Бу Украинаҕа байыаннай эпэрээссийэ саҕаланыаҕыттан ыла бастакы этиитэ буолар.

Владимир Путин этиитин тутаах тезистэрин тарҕаппаттар. Ол эрээри, пресс-сэкирэтээрэ Дмитрий Песков иһитиннэрбитинэн, бэрэсидьиэн байыаннай дьайыыны ыытыыны кытта сибээстээх боппуруостарга болҕомтону туһаайыаҕа. “Биһиги олохпут барыта билигин байыаннай эпэрээссийэ тула эргийэр. Онон байыаннай дьайыы хайдаҕын да иһин олохпутугар-дьаһахпытыгар уонна континент олоҕор дьайар. Ол иһин бэрэсидьиэн үгүс болҕомтотун манна ууруо диэн күүтүллэр”, — диэн Кремль бэрэстэбиитэлин ТАСС цитаталыыр.

Путин этиитин байыаннай эпэрээссийэ ыытыллыбыта биир сыла буолуо аҕыйах хонук иннинэ, ону тэҥэ АХШ бэрэсидьиэнэ Джо Байден олунньу 20 күнүгэр Украинаҕа кэлиитин күөнүгэр ыытылларынан уратылаах. Ол курдук, Байден бэҕэһээ Киевкэ Арассыыйаны утары саҥа сааҥсыйалары уонна 700 тааҥка, тыһыынча бронемассыына, 50 ракета ситимэ уонна салгын оборуонатын сириэстибэлэрэ киирэр Украинаҕа көмө саҥа пакетын  биллэрдэ.  Салгыы Байден Варшаваҕа НАТО илиҥҥи блогун бэрэстэбиитэллэрин кытта көрсүөхтээх.

Парламентарийдар этиигэ дойду экэниэмикэтин сайыннарыыга, көмүскэнэр кыаҕын уонна куттала суох буолуутун хааччыйыыга уонна үгэс курдук Арассыыйа олохтоохторун социальнай хааччыйыы миэрэлэригэр болҕомто ууруллуо дииллэр. ГосДуума дьокутааттара Арассыыйа саҥа эрэгийиэннэрин өйөөһүнү тумнуо суоҕа диэн саныыллар.

Сонуннары киэҥник тарҕатар федеральнай ситимнэр иһитиннэрэллэринэн, этии тиэкиһин бэлэмнээһин үлэтэ саҕаламмыта ыраатта уонна сабыылаах аан нөҥүө ыытыллыбыта. Бэрэсидьиэн уонна бырабыыталыстыба дьаһалтатын салаалара кыттыбыттара.

Федеральнай телеханааллар эфирдэрин сеткатыгар Арассыыйа бэрэсидьиэнин Федеральнай Мунньахха этиитин иһитиннэриитин быһа биэриитин көрдөрүүнү киллэрдилэр. Ол эрээри Путин уһуннук этиэн сөп. Саамай уһуннук 2018 сыллаахха иһитиннэрбитэ, онно 1 чаас 55 мүнүүтэ устата барбыта. 2021 сыл муус устарга судаарыстыба баһылыга 1 чаас 19 мүнүүтэ тыл эппитэ.

СИА.