Бүгүн Ый Сиргэ муҥутаан чугаһыаҕа

Алтынньы 7 күнүгэр Ый Сиргэ саамай муҥутаан чугаһыаҕа, ол түмүгэр  уруккутунааҕар өссө бүк улаатан уонна чаҕылхай буолан көстүөҕэ.

Маннык көстүүнү «улахан ый» — «суперлуние» диэн ааттыыллар. Бу туһунан ТАСС-ка Ураллааҕы федеральнай университет үөрэх астрономическай обсерваториятын инженерэ Владилен Санакоев иһитиннэрдэ.

Онон алтынньы 7-8 күннэригэр Ый чугаһаан, улаатан, олус кыраһыабай көстүүлээх буолуоҕа.

РАН куйаары үөрэтэр институтун Күн астрономиятын лабораториятын учуонайдара этэллэринэн, Ый сырдыга 25 %, кээмэйэ 13 %  улаатыахтаах. Онон халлааҥҥа саамай улахан Ыйы көрүөххэ сөп.

Ый Сиргэ муҥутуур чугаһаан, ууну тардар күүһэ эмиэ улаатар. Онон үксэ ууттан турар харамайдарга эмиэ дьайыылаах буолуон сөп.

«Суперлуние» сезона 3-4 ыйы быһа салҕаныан сөп. Онон сэтинньи 5 күнүгэр, ахсынньы 4 күнүгэр, тохсунньу 3 күнүгэр эмиэ улахан, чаҕылхай Ыйы көрөр кыахтаахпыт диэн учуонайдар этэллэр.

Дьокуускай куоракка былыта суох буоллаҕына, өрүс кытылыгар киирэн көрөр олус кэрэ көстүүлээх. Өрүс ньуура мууһура быһыытыйбыт, ол онно күлүгүн көрүнэн, Ый суола көмүс курдук күлүмүрдүү сытар буолар. 202, 203 түөлбэлэртэн бэртээхэйдик көстөр. Ый илин диэкиттэн тахсар.

Санатар буоллахха, Ый Сиртэн 384 467 килэмиэтир тэйиччи сытар. Кини орбитата Сиргэ чугаһаан, тэйэн ылар кэмнэрдээх. Тэйэр кэмигэр 405 тыһыынча килэмиэтир ыраатар.