Бүгүн — Үлэ Дьоруойа Михаил Готовцев төрөөбүт күнэ

Бүгүн, тохсунньу 2 күнүгэр,​ Российскай Федерация Үлэ Дьоруойа, Үлэ Албан аатын уордьанын толору кавалера,​ Саха Өрөспүүбүлүкэтин ытык киһитэ,​ Уус Алдан улууһун “Удьуор” бааһынай хаһаайыстыбатын баһылыга Михаил Николаевич Готовцев төрөөбүт күнэ.

Ытык киһибитигэр Саха Өрөспүүбүлүкэтин Тыатын хаһаайыстыбатын министиэристибэтин, Саха сирин бары үлэһит дьонун, олохтоохторун аатыттан​ төрөөбүт Тандатын, Уус Алдан улууһун, бүттүүн Сахабыт сирин киэҥ ыырга ааттаппыт ытык киһини, дьоһун күнүнэн ис сүрэхтэн истиҥник эҕэрдэлиибит!

Ытыктабыллаах Михаил Николаевич!​ Биһиги өрөспүүбүлүкэбит тыатын хаһаайыстыбатыгар эн​ курдук эҥкилэ суох бэриниилээх, үлэттэн толлон турбат дьон баар буоланнар үлэ өрө тахсар, сайдар, нэһилиэккэ олох тупсар, киэркэйэр.

Томороон тымныылаах, өҥүрүк куйаастаах төрөөбүт дойдубутугар Саханы саха дэтэн кэлбит хороҕор муостааҕы утумнаахтык сырыырҕаппыт, үүт үрүйэни үрүлүтэ сүүрдүбүт, тыа хаһаайыстыбатын араас хабааннаах үлүскэннээх үлэтэ саҥа таһымҥа тахсарыгар үгүс сыратын-сылбатын уурбут чулуу ыанньыксыкка күргүөмнээх үлэҕэр сүгүрүйэн туран, махталбытын биллэрэбит.

Эн сырдык суоллаах олоҕуҥ үүнэр көлүөнэҕэ үлэҕэ, төрөөбүт дойдуга бэриниилээх буолуу, иһирэх таптал үрдүк холобура буолар.

Ытыктабыллаах Михаил Николаевич, үлэһит киһи солообут суолун аныгы дьон сүтэрбэккэ-оһорбокко салгыы хаҥатан, сайыннаран сылдьыахтара диэн эрэнэбит. “Удьуор” бааһынай хаһаайыстыба инникитин даҕаны өрөспүүбүлүкэҕэ биир бастын хаһаайыстыба кэккэтигэр сылдьан, тыа хаһаайыстыбатын туругурда туруохтун! Күүстээх үлэҕитинэн, ситиһиигэ дьулуургутунан ылбыт кыаххытын ыһыктыбакка салгыы күүскэ сайдаргытыгар, Сахабыт сирэ чэчирии сайдарыгар дьоһун кылааккытын киллэрэргитигэр ис сүрэхпититтэн баҕарабыт! Чөл туругу, чугас дьоҥҥор уйгулаах олоҕу, дьолу-соргуну баҕарабыт!

Ытыктабылы кытта СӨ тыатын хаһаайыстыбатын миниистирэ Александр Атласов.