Бүгүн – Бүлүү эбэ күнэ
![](https://sakha-sire.ru/wp-content/uploads/2023/05/bf53cd2b-0941-425a-9bcb-621f1943f4d5-900x596.jpg)
Бүгүн, ыам ыйын 25 күнүгэр, Бүлүү бөлөх улуустара ырыаҕа ылламмыт, хоһооҥҥо хоһуллубут Бүлүү эбэ күнүн бэлиэтииллэр.
Бүлүү эбэ – Өлүөнэ өрүс саамай уһун уонна бөдөҥ салаата. Алдан кэнниттэн иккис улахан өрүһүнэн биллэр. Бүлүү эбэ уһуна 2650 км, тардыыта 454000 км², сүүрүгүрүүтэ – 46.2 км³.
Бу бэлиэ күнү олохтуур туһунан аан бастаан Үөһээ Бүлүү улууһунааҕы айылҕа харыстабылын иниспиэкисэйэтин начаалынньыга Василий Титов Сунтаар улууһугар ыытыллыбыт экологтар тэрээһиннэригэр этии киллэрбитэ.
Ол кэннэ 2017 с. Арассыыйааҕа экология сыла биллэриллибитигэр «Бүлүү» уопсастыбаннай экологическай кэмитиэт тэрийбит эрэгийиэннээҕи экологическай пуорумугар Бүлүү күнүн ыам ыйын 25 күнүгэр бэлиэтииргэ быһаарбыттара. Бу кэмҥэ Бүлүү эбэ мууһуттан босхолонор уонна уута хаатынан турар кэмэ диэн талбыттара.
Бэйиэт Леонид Попов Бүлүү эбэни хоһуйбутун аахтахпына, харахпар Бүлүү эбэ хотун нэлэһийэ устара көстөн ыларга дылы.
Бүлүү, Бүлүү эбэккэбин
Бүгүн өйдөөн кэллим мин:
Кэҕэ этэр, өтөн үөтэр
Кэрии, чараҥ сирдэрдээх,
Дьэргэйбэхтии сүүрэр-көтөр
Дьигискэннээх сүүрүктээх…
Сообщить об опечатке
Текст, который будет отправлен нашим редакторам: