Бүгүн Дьокуускайга сомоҕолоһуу оһуокайа дьиэрэйдэ (ВИДЕО)

Бүгүн, балаҕан ыйын 7 күнүгэр, Дьокуускай куорат Орджоникидзе болуоссатыгар «Биһиги күүспүт — сомоҕолоһууга!» диэн норуот оһуокайа буолан ааста. Саха сирин Дархан этээччилэрэ сомоҕолоһор, өрө күүрүүлээх оһуокайы эттилэр.

Сомоҕолоһуу оһуокайыгар Ил Дархан Айсен Николаев, норуот дьокутааттара, тэрилтэ салайааччылара, байыаннай дьайыы кыттыылаахтара, уопсастыбаннай тэрилтэлэр бэрэстэбиитэллэрэ, устудьуоннар кытыннылар. Бүгүҥҥү тэрээһин туһунан дьон санаатын иһиттибит.

Мария, социальнай үлэһит:
— Үгүс киһи сахалыы таҥнан кэлэн үҥкүүлээбитин астына көрдүм. Ону тэҥэ, Оһуокай күнэ төрүттэммитин олус сэргии иһиттим, олус үөрдүм. 

Светлана И., бүддьүөт үлэһитэ:
—  Оһуокай өрө күүрүүлээхтик, олус үчүгэйдик ааста. Дьон астынна, күүспүтүгэр күүс эбиннибит. Сыл аайы маннык оһуокайы ыыталлара буоллар, патриотическай тыын уһуктуо эбит дии санаатым. Оһуокай күнэ төрүттэммитэ саамай сөп.

Санатар буоллахха, Ил Дархан  Айсен Николаев бүгүн Оһуокай күнүн төрүттүүр туһунан Ыйаахха илии баттаата.