Бүгүҥҥүттэн Эр Санаа Ох-Хотор саҥа киинэтэ көстөр

Бүгүҥҥүттэн, ыам ыйын 22 күнүттэн, Эр Санаа Ох-Хотор  режиссердаан устубут  “Абааһы” киинэтэ  өрөспүүбүлүкэ тыйаатырдарыгар көрдөрүллэр.

Бу иннинэ киинэни устааччылар “Сахамедиа” өрөспүүбүлүкэтээҕи пресс-кииҥҥэ суруналыыстарга кэмпириэнсийэ оҥордулар. Кэмпириэнсийэҕэ режиссер Никандр Федоров-Эр Санаа Ох-Хотор, Күүстээх уол оруолун оонньообут  Эрхан Слепцов, ситэриилээх продюсер Айхан Федоров, худуоһунньук-туораарааччы Валерия Черова, оператор Аян Васильев кытыннылар.

Режиссер эппитинэн, кини бу киинэни устар төрүөттэриттэн биирдэстэринэн   The Last of Us көмпүүтэр оонньуута буолбут.

“Абааһы” киинэ бастакы чааһа ойууннары, уустары уонна олоҥхоһуттары сойуолаһыыттан саҕаланар. Бүтэһик ойуун хаалбытын билэннэр,  аны кинини “бултаһаллар”…

Кэпсэтии бастаан ыйытыыларга хоруйдааһынтан саҕаланна. Режиссер соторутааҕыта уһулан быракаакка тахсыбыт “Хапсыһыы” киинэтин кэнниттэн тоҕо эмискэччи тосту-туора жанрга көһөн хаалбытын туһунан ыйыттылар. Киинэ жанрын биир тылынан быһаччы этэн кэбиспэт эбиккин:  апокалиптика (фантастика),  фэнтэзи…

 Эр Санаа Ох-Хотор:

“Хапсыһыы” киинэ  уһулла сырыттаҕына хайыы үйэ бу киинэ туһунан толкуйдуу сылдьыбытым. Режиссер бииртэн биир тиэмэҕэ, олох атын жанрга көһөн үлэлээтэҕинэ эрэ сайдар  дии саныыбын. Ол бэйэбэр да, көрөөччүгэ да интэриэһинэй. Үчүгэй бырайыагы толкуйдаан устарым туһунан итэҕэтиэхтээхпин, ол иһин хамаанда диэн баар. Бастатан туран,  бэйэбэр уонна сценариспар итэҕэйэбин. Бүтүн хамаанданан үлэлээн, киинэни кыайдыбыт дии саныыбын.

Бу киинэни устар санаа  ааппын Айыы тыыннаах Эр санаа Ох-Хотор диэҥҥэ уларытар уонна Выборг куоракка “Окно в Европу” киинэ бэстибээлигэр кыттар кэммэр киирбитэ. Сценарийын Абдумалики Холигы кытары 11 күн иһигэр суруйбуппут.

Сценарийы суруйан баран аны үп-харчы көрдөөһүнэ буолбута. Араас тэрилтэлэртэн, ол иһигэр судаарыстыбаннай,  көрдүү сатаабытым. Ким да харчы биэриэн баҕарбатаҕа.  Дьон сценарийы да аахпаттар, үлэ түмүгүн эрэ көрүөхтэрин баҕараллар эбит диэн түмүккэ кэлбитим.  Уопсайынан,  режиссердар ыра санаа оҥостубут киинэлэрин  устаарылар уоннуу сылынан күүтэн  олорон хаалыахтарын сөп. Мин оннук олорор санаам суох этэ!

Киинэбит 5 чааһа барыта уһуллуоҕа. Олоҥхо курдук буолуоҕа…”—диэн кэпсээтэ.

«Абааһыны» устубут хамаанда киинэни устарга ылсарыгар бастаан долгуйбуттарын,  режиссеру кытары үлэлииргэ чэпчэкитин, уобарастар бэйэлэрэ ситимнэнэн кэлэн испиттэрин, бары биир санаанан үлэлээбиттэрин туһунан кэпсээтилэр.

Оператор Айаан Васильев: “Эр Санаалыын  бастакыбын үлэлээтим. Бу киинэҕэ саамай интэриэһинэйэ диэн киинэ толкуйа  научнай фантастика (апокалипсис) буолан кэрэхсэппитэ. Төһө да сөптөөх аппаратуралардаахпыт да иһин,  баар сырдыгы туһунан устубуппут. Ол эбэтэр хайдах күн-дьыл турарыттан тутулуктаммакка, хайдах баарынан устан испиппит”, — диэн устуу хаамыытын туһунан кылгастык билиһиннэрдэ.

Күүстээх диэн ааттаах уол оруолун оонньообут Эрхаан Слепцов: “Мин киинэҕэ 13 сааспыттан уһуллабын. Барыта 10 бырайыакка уһулуннум, бу — 8-с бырайыагым.  “Кэрэни көрбүт” “(“Не хороните меня без Ивана”),  “Кыталыктаах кырдалым”, “Чума” уо.д.а. киинэлэргэ бэйэм саастаах уолаттары оонньообутум. Бу “Абааһы” киинэҕэ эмиэ бэйэм сааспар сөп түбэһэр уол оруолугар уһулуннум. Төһө да киинэ жанра атынын иһин, наһаа үчүгэйдик үлэлээтибит, устар бириэмэбит да түргэнник ааһан хаалбыт курдуга”.

Киинэни устааччылар эппиттэринэн, “Абааһы” киинэ 5 чаастаах буолуохтаах. Хас биирдии чааһа ситимнээхтэр, онон бу устуоруйа хайдах түмүктэнэрин көрөөччүлэр интэриэһиргиэхтэрэ.

Киинэни 2024 сыллаахха балаҕан ыйыгар Мэҥэ Хаҥалас улууһун Наахара сэлиэнньэтигэр уонна Нам улууһун Никольскайыгар 17 күн  устубуттар. Киинэ бырайыагын  бүддьүөтэ 5 мөлүйүөн кэриҥэ буолбут (1,2 мөлүйүөнэ – аҥардас киинэни устууга). Онуоха режиссер бэйэтин үбүн-харчытын туһаммытын туһунан эттэ.

Киинэ иккис чааһын сценарийа хайыы үйэ суруллубут. Киинэ бастакы чааһын көрдөрүүтэ хайдах түмүктээх буоларыттан көрөн,  атырдьах ыйыгар салгыы  устар  былаанныыллар.

Оруолларга  оонньууллар: Гаврил Менкяров,  Эрхан Слепцов, Василий Слепцов, Роман Атласов,  Петр Баснаев уо.д.а.

х х х

Норуотун таҥнарбыт Оталан-Хааны оонньообут  Олоҥхо тыйаатырын, киинэ артыыһа Гаврил Менкяров:

«Антагонист оруолун оонньуурга этии киллэрбиттэригэр мин интэриэһиргии санаабытым. Итинник оруоллары тыйаатыртан ураты киинэҕэ оонньуу илигим. Омсолоох дьоруойу оонньуурбар тас көрүҥмүн, өйбүн-санаабын тосту уларытыахтааҕым. Ол иһин, бастатан туран, баттахпын тараҕайдыы кырыйтарбытым уонна тииспин уларыппытым…

Мин араас хабааннаах дьоруойдары оонньуурбун, саҥа уобарастары арыйарбын сөбүлүүбүн. Онуоха барытын  кыайарга элбэхтик үлэлиэххин наада”.