Бүгүҥҥүттэн Хотугу дойду маастардарын быыстапкалара аһыллыаҕа

Бүгүн 15.00 чаастан “Хранительницы традиций”  диэн Хотугу дойду норуоттарын маастардарын быыстапката аһыллыаҕа. Быыстапка “Аборигенка” национальнай-култуурунай дьахталлар уопсастыбаннай тэрилтэлэрэ төрүттэммитэ 30 сылыгар ананар.

Быыстапканы арыйыы сиэрин-туомун кэнниттэн 16.00 чаастан дьиэ кэргэн раритетын билиһиннэриэхтэрэ. Тэрийээччилэр этэллэринэн, быыстапка биир уратытынан  былыргы оҥоһуктары, ол иһигэр Алдаҥҥа көстүбүт былыргы үҥүүнү, хос эбэлэриттэн хаалбыт матаҕаны уо.д.а. билиһиннэрии  буолуоҕа.

Онтон бэс ыйын 18 күнүгэр “Омук үгэс буолбут таҥаһын харыстааһын уонна сайыннарыы  дьоһун суолталаах кыһалҕалара: теория уонна быраактыка”  төгүрүк остуолга тирээн турар кыһалҕалары дьүүллэһиэхтэрэ, санааларын сайа этиэхтэрэ. Туспа бырагырааманан маастар-кылаастар ыытыллыахтара.

Быыстапка Өксөкүлээх Өлөксөй аатынан Норуоттар доҕордоһууларын дьиэтин национальнай култууралар галереяларыгар бэс ыйын 21 күнүгэр диэри үлэлиэҕэ.