Бүгүҥҥүттэн “Инникигэ хардыы” билим-күөн күрэс саҕаланна

Бүгүҥҥүттэн “Инникигэ хардыы” өрөспүүбүлүкэтээҕи эдэр чинчийээччилэр үбүлүөйдээх, 30-с төгүлүн ыытыллар билим-күөн күрэстэрэ саҕаланна. Быйыл өрөспүүбүлүкэ бары улуустарыттан 13 сиэксийэнэн 1500-тэн тахса оҕо кыттар.

Кыайан кэлэр кыаҕа суох Арктика, хоту, итиэннэ Өлүөхүмэ, Ленскэй улуустарын үөрэнээччилэрэ тэйиччиттэн кыттыахтара диэн тэрийээччилэр иһитиннэрэллэр.

“2021 сылтан кэмпириэнсийэ РФ Үөрэҕириитин министиэристибэтин тэрээһиннэрин испииһэгэр киирэр. Бу сыллар тухары кэмпириэнсийэ өрөспүүбүлүкэ үөрэнээччилэрин бырайыактарын Бүтүн Арассыыйатааҕы үрдүк эриэйтиннээх тэрээһиннэргэ таһаарар былаһаакканан буолла. Быйыл Арассыыйатааҕы испииһэккэ киирэр кэмпириэнсийэҕэ лауреат, дипломант буолбуттар тус бааллары ылаллар, ону тэҥэ, уһулуччулаах көрдөрүүлэри ситиспит оҕолор судаарыстыбаннай федеральнай платформаларыгар киирэллэр. Билиҥҥитэ биһиги өрөспүүбүлүкэбититтэн 1247 үөрэнээччи аата киирэн турар”, – диэн Билим Дьоҕус академиятын ректора Василий Павлов этэр.

Тэрээһин тохсунньу 12-14 күннэригэр буолар. Кэмпириэнсийэ, биһиги өрөспүүбүлүкэбитигэр, Арассыыйаҕа билим, тиэхиньикэ сайдыытыгар  сүҥкэн кылаатын киллэрбит уһулуччулаах учуонай, үөрэнээччилэр, ыччат ортотугар чинчийэр үлэни киэҥник тарҕаппыт, Билим Арассыыйатааҕы академиятын дьиҥнээх чилиэнэ, тиэхиньиичэскэй билим дуоктара В.П.Ларионов аатын сүгэр. Тэрээһин үөрүүлээх аһыллыыта бүгүн күн иккис аҥаарыгар Дьокуускайга  “Өрөгөй” спортсменнары бэлэмниир кииҥҥэ буолуоҕа.