Бүгүҥҥүттэн Монголияҕа мас-рестлиҥҥэ аан дойду чөмпүйэнээтэ саҕаланар

От ыйын 30 күнүттэн атырдьах ыйын 3 күнүгэр диэри Монголия Архангай аймакка эр дьоҥҥо уонна дьахталларга мас-рестлиҥҥэ VII Аан дойду чөмпүйэнээтэ ыытыллар.

Күрэхтэһии «АРА» спортивнай комплекска буолуоҕа уонна аан дойду 43 дойдутуттан бастыҥ атлеттары түмүөҕэ диэн «Триумф» пресс-сулууспата иһитиннэрэр.

Арассыыйа сүүмэрдэммит хамаандатыгар Саха сирин бастыҥ мадьынылара кыттыахтара:

Эр дьон:

60 кг — Артур Жирков;
65 кг — Артем Зорин;
70 кг — Айсиэн Мигалкин;
75 кг — Василий Захаров;
80 кг — Егор Свинобоев;
85 кг — Айсен Атастыров;
90 кг — Семен Борисов;
105 кг — Дмитрий Попов;
125 кг — Иван Галкин;
125+ кг — Виктор Колибабчук.

Дьахталлар:

55 кг — Лейла Шагисултанова;
60 кг — Юлия Ковалева;
65 кг — Светлана Молукова;
70 кг — Марина Федоренко;
75 кг — Саина Седалищева;
85 кг — Мохинур Абдузойирова;
85+ кг — Татьяна Баишева.

Чөмпүйэнээт мас-рестлиҥҥэ аан дойдутааҕы Федерация көҕүлээһининэн, Монголия мас-рестлиҥҥэ Федерациятын кытта бииргэ, Архангай аймак былаастарын өйөбүлүнэн ыытыллар. Тэрийээччилэр турнир үрдүк таһымнаахтык ыытыллыаҕын уонна киирсиилэр кэрэхсэбиллээх буолуохтарын эрэннэрэллэр. Арассыыйа хамаандата үгэс быһыытынан бастыҥнар кэккэлэригэр киирэллэр уонна аан дойду мас-рестлиҥҥэ лидер буолар ааттарын бигэргэтэр соруктаахтар.