Бүгүҥҥүттэн үөрэх үлэһиттэрин Тохсунньутааҕы мунньаҕа саҕаланна

Бүгүҥҥүттэн үөрэх үлэһиттэрин үгэскэ кубулуйбут Тохсунньутааҕы мунньаҕа саҕаланна. Быйыл тэрээһин тохсунньу 22-26 күннэригэр буолуоҕа.

Мунньах Саха сиригэр үөрэх биир кэлим ситимин сайыннарыыга туһаайыллар. Ил Дархан “2030 сылга диэри Саха Өрөспүүбүлүкэтигэр үөрэх биир кэлим ситимин сайыннарыы туһунан” Саҥа дьыл иннинээҕи Ыйааҕар сөп түбэһиннэрэн, итиэннэ Оҕо саас, Дьиэ кэргэн сылынан үөрэх бары хайысхатын хабан киэҥ бырагыраамалаах ыытыллыаҕа.

Тэрээһиҥҥэ үөрэх управлениетын, тэрилтэтин салайааччылара, педагогтар, төрөппүттэр уонна оҕолор, уопсастыбаннай тэрилтэлэр кыттыахтара. Ону таһынан, федеральнай эспиэртэр кэлэллэрэ күүтүллэр. Тохсунньутааҕы мунньах бырагырааматын манна көр.