Бүгүҥҥүттэн земскэй учууталлар пуорумнара саҕаланна

Арассыыйаҕа “Земскэй учуутал” федеральнай бырагыраама үлэлээбитэ быйыл биэс сылын туолла. Бүгүн Дьокуускайга земскэй учууталлар өрөспүүбүлүкэтээҕи бастакы пуорумнарын аһар үөрүүлээх тэрээһин буолан ааста.

Үөрэх уонна билим министиэристибэтин каадыр бэлиитикэтигэр салаатын салайааччыта Мария Винокурова: “Земскэй учууталлар дьэ көрүстүлэр. Бу тэрээһин туһунан үөрэҕи сайыннарар уонна идэ таһымын үрдэтэр институту кытта хаста да кэпсэтэн турабын. Арассыыйа араас муннуктарыттан кэлбит бастакы хараҥаччылар – 19 маҥнайгы земскэй учуутал араас оскуолаларынан тарҕаһан үлэлэрин саҕалаабыттара.

Бу күннэргэ үүнэр көлүөнэни үөрэтиигэ, иитиигэ саамай суолталаах былаһааккалар ыытыллыахтара. Дойду, өрөспүүбүлүкэ таһымыгар учуутал быһыытынан үрдүк көрдөрүүнү ситиспит бастыҥ педагогтар уопуттарын үллэстиэхтэрэ” – диэн эттэ.

Мария Михайловна иһитиннэрбитинэн, күн бүгүн Саха сиригэр барыта 80 земскэй учуутал үлэлиир. Бырагыраама быйыл эмиэ салҕанар, өрөспүүбүлүкэ 11 кубуотаҕа учууталы ыларга сайаапкалары хомуйар. Салгыы 2026-2027 сылларга өссө 70 кубуота көрүллүөхтээх диэн эттэ.

Үөрэҕи сайыннарар уонна идэ таһымын үрдэтэр институт дириэктэрэ Ньургун Павлов: “Күн-дьыл ааһара бэрт түргэн эбит. 2019 сыллаахха докумуоннары толорор кэммит күн бэҕэһээ эрэ курдук этэ. Бу бастакы пуорум эһиги – земскэй учууталлар баар буолаҥҥыт ыытыллар. 2023 сыл түмүгүнэн көрдөххө, биһиги өрөспүүбүлүкэбит земскэй учууталлар кэлэн болдьохторо түмүктэниэр диэри үлэлиир инники күөҥҥэ сылдьар эрэгийиэннэриттэн  биир бастыҥнара. Хас биирдиигитигэр махтанабын” – диэн бэлиэтээтэ.

“Земскэй учуутал” федеральнай бырагыраама бастакы пуорумун кыттыылаахтарын Дьокуускай куораттааҕы “Кэскил” уһуйаан иитиллээччилэрэ, Оҕо айымньытын дыбарыаһын “Этигэн хомус” ансаамбыл (сал. А.С.Жиркова), “Земскэй учуутал” бырайыагынан Дьааҥы улууһугар тиийэн ситиһиилээхтик омук тылын учууталынан үлэлии сылдьар Оксана Бочарова ураты нүөмэрдэринэн эҕэрдэлээтилэр.

Кыттааччылар санаалара

Эрика Эртине, Алдан куорат 1-кы нүөмэрдээх оскуолатын математикаҕа учуутала, “Земскэй учууталлар” ассоциация бэрэссэдээтэлэ:

— Саха сирэ – Арассыыйа биир саамай улахан эрэгийиэнэ. Улуустар бэйэ-бэйэлэриттэн тэйиччилэр, килиимэтэ олус уратылаах. Ол эрээри, биһиги, 2020 сыллаахха бастакынан кэлбиттэр тулустубут. Бу биэс сыл тухары биһигини көрсүбүт, арыаллаабыт, өйөөбүт дьоҥҥо барыгытыгар махтанабыт. Саха сирин кэнниттэн туохтан да куттаммаппын, земскэй учууталынан үлэлээбитим диэн киэн тутта ааттыам” – диэн санаатын этэр.

Александр Федоров, Уус Алдан улууһун Танда оскуолатын физикаҕа, информатикаҕа учуутала:

— Тандаҕа 2020 сылтан үлэлиибин. Тиийээппин кытта дьиэнэн-уотунан хааччыйбыттара, педагогическай кэлэктиип үөрэ-көтө көрсүбүтэ. Улахан уустугу көрүстүм диир кыаҕым суох. Арай, суол-иис өттүгэр ыарахаттардаах этэ. Кэлэктииби, үөрэнээччилэри кытта уопсай биир санаанан саҕалаабытым, номнуо биэс сыл ааһа оҕуста. Быйыл дуогабарым түмүктэнэр. Эксээмэннэр кэнниттэн салгыы куоракка олохсуйар былааннаахпыт – диэн этэр.