Бүгүҥҥүттэн БРИКС мунньаҕа саҕаланна

Атырдьах ыйын 22-24 күннэригэр Соҕуруу Африка Өрөспүүбүлүкэтигэр Йоханнесбург куоракка Бразилия, Арассыыйа, Индия, Кытай уонна Соҕуруу Африка түмсүүлэрин (БРИКС) мунньаҕа саҕаланна.

Санатан эттэххэ, бу холбоһук 2006 сыллаахха Санкт-Петербурдааҕы экэниэмикэ форумун кэмигэр тэриллибитэ. Быйыл холбоһук улахан мунньаҕа уон бэһис төгүлүн ыытыллар. БРИКС мунньаҕар биэс дойду экэниэмикэлэрин бөҕөргөтүүгэ улахан үлэни ыыталлар, судаарыстыбалар икки ардыларыгар үлэлэһиигэ бу биир улахан суолталаах тэрээһининэн буолар.

Быйылгы мунньах бэбиэскэтигэр биир сүрүн боппуруоһунан БРИКС састаабыгар атын судаарыстыбалар киириилэрин көрүөхтээхтэр. Былырыын БРИКС састаабыгар Аргентина уонна Иран киирэбит диэн сайабылыанньа суруйбуттара. Салгыы Алжир, Египет, Бангладеш, Эфиопия, Белоруссия, о.д.а. сайабылыанньа биэрбиттэрэ. Билигин БРИКС састаабыгар киириэн баҕалаах дойдулар испииһэктэрэ сүүрбэттэн таҕыста.

Бу саммикка РФ бэрэсидьиэнэ Владимир Путин видео-сибээһинэн кыттара былааннанар. Арассыыйа дэлэгээссийэтин РФ тас дойдулар дьыалаларын миниистирэ Сергей Лавров салайан илдьэ сылдьар.