Быһа эпиир: Тутар этэрээттэр үлэлэрэ

СӨ ыччат дьыалаларыгар уонна социальнай коммуникацияҕа миниистирэ Петр Шамаев аһаҕас эпииргэ тахсан, эдэр ыччат уонна устудьуон этэрээттэрин үлэтин туһунан  кэпсээтэ. 

Петр Шамаев быйыл эдэр ыччакка аналлаах  ханнык бырайыактар ыытыллыбыттарын, хас киһи кыттыбытын, салҕыы ханнык тэрээһиннэр ыытыллалларын сырдатта.

— Бэс ыйын 12 күнүгэр, Арассыыйа күнүгэр, устудьуоннар этэрээттэрэ үлэлэрэ саҕаламмыта. Уопсайа 2,5 тыһыынча  ыччат устудьуоннар этэрээттэригэр үлэлиэхтэрэ. Билиҥҥитэ тутуу этэрээттэригэр тыһыынчаттан тахса устудьуон суруттарда. Кинилэр  улуустарынан  арахсан үлэлиэхтэрэ.   Тыа хаһаайыстыбатын этэрээттэригэр быйыл 300 киһи киирбитэ. Итини  сэргэ  педагогическай этэрээттэргэ 200 устудьуон лааҕырдарга  баһаатайдыахтара.  Сервиснэй этэрээттэргэ суруттарбыт устудьуоннар,  Анапаҕа, Крымҥа, Сочига уо.д.а  куораттарга тиийэн икки ыйга дуогабардаһан үлэлии  барыахтара, — диэн миниистир эпиир кэмигэр иһитиннэрдэ.

Аһаҕас эпиир кэмигэр   “14-15 саастаах оҕону ханна, хайдах үлэҕэ биэриэххэ сөбүй?”  диэн ыйытыы киирбитигэр:

— Улууска олорор буоллаххытына, социальнай  көмһскэл салаатыгар эбэтэр эдэр ыччат салалтатыгар тиийэн ыйыталаһыаххытын сөп.  Дьокуускай куоракка  устудьуон этэрээттэригэр тиийэн  чопчулаһыҥ, — диэн  Петр Шамаев эттэ.

Диана Новгородова