«Быһа лииньийэҕэ» Ил Дархаҥҥа 500 тахса ыйытыы киирдэ

Ил Дархан Айсен Николаев «Быһа лииньийэтигэр» эрэгийиэн олохтоохторуттан 500 тахса ыйытыы киирбит. Бу туһунан өрөспүүбүлүкэ ЦУРа суруйар. Бэлиэтээн суруйдахха, өрөспүүбүлүкэ олохтоохторуттан ыйытыылары тутуу муус устар 27 күнүгэр диэри салҕаныаҕа.

«Саамай дьону долгутар сүрүн ыйытыыларынан суол-иис, тырааныспар, ОДьКХ уонна энэргиэтикэ, тутуу, хаарбах дьиэттэн көһүү боппуруостара  буолар. Ону сэргэ социальнай көмө, өйөбүл, үлэ, доруобуйа харыстабылын, үөрэх, сибээс, интэриниэт туһунан буолла. Ол курдук, саамай көхтөөхтүк Дьокуускай, Ленскэй, Алдан, Мииринэй,Өлүөхүмэ, Сунтаар, Ньурба, Нерюнгри, Томпо, Уус Алдан, Мэҥэ Хаҥалас, Хаҥалас оройуоннара ыйытыылары биэрдилэр. Арктическай оройуоннартан сүрүннээн Анаабыр, Үөһээ Халыма, Дьааҥы уонна Орто Халыма оройуоннарын олохтоохторо ыйытыылары биэрдилэр», — диэн ЦУР салайааччыта Василий Десяткин эттэ.

Кини бэлиэтээбитинэн, бу сылга «Быһа лииньийэҕэ» ыйытыылары видеоҕа устуу куорматынан ыытыахха сөп диэтэ.  Маны сэргэ колл-киин түүннэри-күнүстэри үлэлиир. Бары киирбит ыйытыылар туһааннаах былаас уорганнарыгар тиийэллэр. Боппуруостары көрүү уонна быһаарыы үлэтэ тута саҕаланар диэтэ Василий Десяткин.

Бэлиэтээн эттэххэ, «Быһа лииньийэ» Өрөспүүбүлүкэ күнүгэр муус устар 27 күнүгэр киэһэ 18.00 чаастан «Саха НКИИХ»  ханаалыгар, «Якутия 24», «Тэтим» араадьыйа , «Арассыыйа араадьыйата», «Виктория Саха», «СТВ-араадьыйа» ханаалларыгар буолуоҕа.