Быһаҕынан анньыһыы, күүһүлээһин, түөкүннээһин…

Ааспыт сууккаҕа өрөспүүбүлүкэҕэ буруйу оҥоруу 15 түбэлтэтэ бэлиэтэннэ, холуобунай дьыалалары бэрэбиэркэлээһин, силиэстийэлээһин өрөспүүбүлүкэ борокуратууратын хонтуруолугар сылдьар. Бу туһунан СӨ Борокуратуурата иһитиннэрэр.

Дьокуускай куоракка 1982 с.т. эр киһи быһаҕынан анньыллан балыыһаҕа киирдэ. Буруйу оҥорууга уорбаланааччы ким буолара билиннэ. Ону тэҥэ киин куорат Якутская уулуссатыгар баар дьиэ кыбартыыратыттан 1969 с.т. дьахтар эмиэ быһаҕынан анньыллан балыыһаҕа киирдэ, уорбаланааччы быһаарылынна.

Дьокуускай куорат олохтоохторуттан суукка иһигэр 1,4 мөл. солк. тахса сууманы түөкүттэр албыннаан уордулар. Түөкүттэр үгүстүк «инвестиция», «суотабай сибээс», «Киин баан сотрудниктара» схеманан албыннаабыттар. Ыал дьиэтин халаабыттарын туһунан биир үҥсүү киирбит.

Миирнэй куоракка наркотигы эргитии эйгэтигэр буруйу оҥоруу тахсыбыт, Үөһээ Бүлүү уонна Дьааҥы улуустарыгар күүһүлээһин туһунан сайабылыанньалар киирбиттэр. Дьокуускай куоракка итирик туруктаах сылдьан хаста да массыынаны ыыппыт дьону туппуттар, биир киһи массыынаны ыытар сымыйа быраабы илдьэ сылдьара быһаарыллыбыт.

Киһи өлүүлээх суол-тырааныспар быһылаана регистрацияламматах. «Нам» айан суолун 16 км. 1993 с.т. суоппар «Тойото Приус» мааркалаах массыынан айаннаан иһэн сатыы дьон сылдьар сирин хаххатын тоҕо көппүт, ол түмүгэр олорсон испит 1971 с.т. киһи эчэйэн балыыһаҕа киирбит.

Ааспыт сууккаҕа 5 суоппар итирик туруктаах сылдьан тутуллубут.