Быйаҥныырга сибиинньэ иитэллэр

Саха сиригэр сибиинньэ иитиитинэн дьарыктанааччы кэнники сылларга аҕыйаата. Бэл, улахан хаһаайыстыбалар сабыллыбыттарын киһи соһуйа истэр. Ол эрээри тус хоту  Аллайыаха улууһугар  сибиинньэ иитэллэр.

Быйаҥныыр нэһилиэгин олохтооҕо Николай Дмитриевич Винокуров сибиинньэ иитиитинэн дьарыктанарыгар көмө көрдөспүт.

— Дьэ, ити курдук, көмө көрдөһөн, бэйэ дьарыктаах буоламмын, кэтэх хаһаайыстыбабын сайыннарарга баҕарбытым. Баҕа санаам олоххо киирэн, сибиинньэлэрбин көрө-истэ олоробун. Комбикорманан, ас тобоҕунан, туох баарынан аһатабын. Быйыл алтынньы 3 күнүгэр 12 сибиинньэ оҕото төрөөбүтэ. Хомойуох иһин, итилэртэн иккитэ өлөн төрөөбүтэ. Уоннааҕылар тыыннаах хаалбыттара. Кэргэммин кытары бэйэбит төрөппүппүт. Сарсыардаттан саҕалаан киэһээҥҥэ диэри быыһаммыта. Сибиинньэм оҕолоругар  туспа турар сир оҥорбутум. Ийэлэрин тахсан эмэллэрин курдук. Күҥҥэ түөртэ эмтэрээччибит. Ол курдук, ийэлэрин балтараа ый эмпиттэрэ. Сибиинньэ көрүүтэ наһаа чэпчэкитэ суох эбит. Икки оҕото ыалдьыбытыгар дьиэбит иһигэр киллэрэн бүөбэйдээбиппит. Анал дьааһыкка биир ый туруорбуппут. Үүттэрин суосканан эмтэрэр этибит. Онон кыһамньыбыт түмүгэр ыалдьыбыттарбыт тиллэннэр, бэртэх кэлэн, хата, билигин барыларынааҕар ордук курдуктар. Ийэ сибиинньэ төрүөн иннинэ атыыры идэһэлээбитим. Этин нэһилиэгим иһигэр атыылаабытым, бары үөрүүнэн ылбыттара. Кыстыылларыгар мас бэлэмнээн, анал уйа туппутум. Сайын таһырдьа турбуттара. Уйаларын турбанан оҥорбутум. Билигин сибиинньэлэрим турар сирин күҥҥэ иккитэ оттобун, — диэн кэпсээтэ Николай Дмитриевич.

Бу курдук, хоту дойду олохтооҕо сибиинньэ иитиитин баһылаан эрэр. Онон,  “Нэһилиэнньэ дьарыктаах буолуутун киинин” нөҥүө “Бэйэ дьарыктаах буолуута” бырагырааманан сибиинньэлэри ылан, абыраммыт.