Быйыл 112 быраас уонна биэлсэр “Земскэй быраас” бырагырааманан үлэлии барыа

2012 сылтан 2024 сылга диэри Саха сиригэр “Земскэй быраас” уонна “Земскэй биэлсэр” бырагырааманан 1557 мэдисиинэ үлэһитэ тыа сиригэр үлэлии  сылдьар: 1290 быраас уонна 267 орто мэдиссиинэ үлэһитэ диэн СӨ Доруобуйа харыстабылын министиэристибэтэ иһитиннэрэр.

Бу бырагыраамаҕа кыттааччыларынан ХИФУ Мэдиссиинэ институтун, киин үрдүк үөрэх тэрилтэлэрин, Мэдиссиинэ кэллиэһин выпускниктара, биир нэһилиэнньэлээх пуунтан атыҥҥа көспүт эбэтэр саҥа үлэлии кэлбит исписэлиистэр буолаллар.

«Быйыл бу бырагырааманан 112 исписэлиис үлэлии барара былааннанар, олортон 72 быраас уонна 40 биэлсэр. Билиҥҥи туругунан, 54 дуогабар түһэрсилиннэ, ол иһигэр 34 бырааһы кытта уонна 20 биэлсэри кытта», – диэн СӨ Доруобуйа харыстабылын министиэристибэтин каадыр отделын салайааччыта Надежда Иванова иһитиннэрдэ.