Быйыл 3333 баһаары сэрэтэр тэрили туруордулар

2025 сыл саҕаланыаҕыттан Саха сиригэр 2774 ыалга 3333 баһаары биллэрэр тэриллэри (АДПИ) туруордулар диэн Гражданскай оборуона уонна нэһилиэнньэҕэ куттала суох буолууну хааччыйар министиэристибэ иһитиннэрэр. 

Өрөспүүбүлүкэ министиэристибэтин иһитиннэриитинэн,  2321 анал тэрили СӨ судаарыстыбаннай баһаарынай сулууспатын үлэһиттэрэ, оттон 1012-ни атын тэрилтэлэр бэрэстэбиитэллэрэ туруорбуттар.

Аппарааттары олорор дьиэлэргэ «Баһаары сэрэт – АДПИ туруор» диэн социальнай аахсыйа чэрчитинэн туруораллар, бу  баһаартан  сэрэхтээх буолуу миэрэлэрин туһунан нэһилиэнньэ билиитин, туһаныытын үрдэтиигэ туһуланар.

Аахсыйа 2025 сыл олунньу 5 күнүттэн ахсынньы 31 күнүгэр диэри ыытыллар. Бу миэрэлэр, бастатан туран, чааһынай дьиэлэр олохтоохторугар уонна тыа сирин нэһилиэнньэлээх пууннарыгар туһуланаллар.

Тэҥнээн көрдөххө, 2024 сылга аахсыйаҕа 4034 ыал хабыллыбыта, 4347 баһаартан сэрэтэр тэрил туруоруллубута. 2021 сылтан 2025 сылга диэри аахсыйа барыта 17 482 ыалы хабан, туруоруллубут баһаар сигнализациятын уопсай ахсаана 21 763-кэ тиийбит.

«Аахсыйа олорор дьиэҕэ баһаар ахсаанын аҕыйатыыга уонна дьон-сэргэ куттала суох буолуутун үрдэтиигэ туһуламмыт систиэмэлээх сэрэтэр үлэ сүрүн өрүтүнэн буолла», — диэн министиэристибэ бэлиэтээтэ.

Бу хамсааһын 2021 сыллаахха саҕаланыаҕыттан ыла, аахсыйаҕа сүүсчэкэ баһаарынай сулууспа үлэһиттэрэ кытыннылар. Бу сыллар тухары кинилэр уопсастыбаннай тэрилтэлэри кытта тыһыынчанан баһаартан сэрэтэр тэриллэри туруоран, өрөспүүбүлүкэ уонунан тыһыынча олохтоохторугар эбии көмүскэл таһымын хааччыйан, үлэлэһэн кэллилэр.

Сиһилии манна аах.