Быйыл Арассыыйа киинэтигэр бэриллибит тас дойдулар наҕараадаларын 19%-на Саха сирин киинэтигэр бэриллибит

Быйыл 2024 сылга Арассыыйа киинэтигэр бэриллибит тас дойдунааҕы наҕараадалар 19% Саха сирин киинэтигэр бэриллибит. Ити туһунан Ил Дархан Айсен Николаев ахсынньы 6 күнүгэр Москваҕа Стратегическай көҕүлээһиннэр ааҕыныстыбаларыгар буолбут тэрээһин кэмигэр иһитиннэрдэ.  

Арассыыйа кинематографтара араас киинэ бэстибээллэригэр, бириэмийэлэригэр ылбыт 52 наҕараадаларыттан 10 наҕаарадын саха киинэтэ ылла.

“Биһиги Москва уонна Питер кэнниттэн киинэни оҥорууга үһүс, саамай көхтөөх эрэгийиэн буоларбытынан киэн туттабыт. Ахсынньы 1 күнүнээҕи туругунан, быйыл Арассыыйа киинэтигэр бэриллибит тас дойдунааҕы наҕараадалар 19%-ын Саха сирин киинэни устааччылара ыллылар”, – диэн Айсен Николаев иһитиннэрдэ.

Дмитрий Давыдов “Чума” киинэтэ Lucania Film Festival (Италия) «За точную кинематографию» чопчулаан этиилээх “Толору кээмэйдээх уус-уран киинэ” диэн наҕарааданы, ону тэҥэ, за игровой фильм goEast – 2024 (Германия) FIPRESCI норуоттар икки ардыларынааҕы пресса федерациятын бирииһин ылбыта.

Алексей Романов “Хаар куйаар номохторо” (“Легенды вечных снегов”) киинэтэ Бишкектээҕи норуоттар икки ардыларынааҕы киинэ бэстибээлигэр (Кыргызстан) Гран-при буолбута, Никандр Федоров “Хапсыһыы” (“Схватка”) киинэтэ – Миинискэйдээҕи “Лiстапад” норуоттар икки ардыларынааҕы киинэ бэстибээлигэр «Судьба человека» дьүүллүүр сүбэ дипломун.

Михаил Лукачевскай “Кыталыктаах кырдалым” (“Там, где танцуют стерхи”) киинэтэ Беларусь Өрөспүүбүлүкэтин бэрэсидьиэнин “За гуманизм и духовность в кино” бирииһин уонна Миинискэйдээҕи “Лiстапад” норуоттар икки ардыларынааҕы киинэ бэстибээлигэр “За лучшую режиссуру игрового фильма имени Михаила Пташука” наҕарааданы, ону тэҥэ, Евразиятааҕы норуоттар икки ардыларынааҕы киинэ бэстибээлигэр (Казахстан) Гран-при ылбыта.

“Потерянные письма” анимационнай киинэ Киин Азия уонна СНГ Almaty Anymation Festival (Казахстан) итиэннэ Golden Ger IFF (Монголия) бастыҥ анимационнай киинэнэн ааттаммыта, оттон “Муҥха” ойуулук – Budapest Short Cut Film Festival (Венгрия) бастыҥ анимационнай киинэнэн.

Ил Дархан уонна Бырабыыталыстыба пресс-сулууспата.