Быйыл Арктика улуустарыгар 522 туонна оҕуруот аһын тириэрдибиттэр

Быйыл Арктика улуустарыгар Арктикатааҕы атыы-логистика хампаанньата олохтоох хаһаайыстыбалар үүннэрбит хаппыысталарын, сүбүөкүлэлэрин, моркуоптарын уонна хортуоппуйун киллэрэн туран, 522 туонна сибиэһэй оҕуруот аһын тириэрдибит.

“Арктикатааҕы атыы-логистика хампаанньата” Саха сиригэр үүннэриллибит оҕуруот аһын Арктика улуустарыгар илдьээри, хортуоппуй, оҕуруот аһын атыылаһарга Тулагы Киллэм нэһилиэгэр баар 11 хаһаайыстыбаны кытта сөбүлэҥ түһэрсибит. Ону тэҥэ, бу олохтоох тыа хаһаайыстыбатын оҥорон таһаарааччыларын өйүүр соруктаах” – диэн Арктикатааҕы атыы-логистика хампаанньатыгар иһитиннэрбиттэр.

Олохтоох оҕуруот аһын тириэрдээччилэр кэккэлэригэр “Урожай” тыа хаһаайыстыбатын хааччыйар-батарар кэпэрэтиип, “Олимп” тыа хаһаайыстыбатын оҥорон таһаарар кэпэрэтиибэ о.д.а. бааллар. Ону тэҥэ, оҕуруот аһын Мэҥэ Хаҥалас, Өлүөхүмэ улуустарын уонна Жатай бааһынай хаһаайыстыбаларыттан атыыласпыттар.

Сыл түмүктэниэр диэри Аллайыаха, Эбээн Бытантай, Өлөөн улуустарыгар өссө үс атыы-логистика киинэ үлэҕэ киириэхтээх. Ол түмүгэр 13 Арктика улууһугар барытыгар тустаах кииннэр баар буолуохтара, бу тиһигин быспакка тириэрдиини хааччыйыаҕа уонна Арктика олохтоохторун олоҕун хаачыстыбатын тупсарыаҕа.

Бу туһунан Ил Дархан уонна Бырабыыталыстыба пресс-сулууспата суруйар.