Быйыл биэс саҥа ФАП уонна быраас амбулаторията үлэҕэ киириэхтэрэ

Быйыл өрөспүүбүлүкэҕэ биэс фельдшерскэй-акушерскай пууну, быраас амбулаториятын уонна фельдшерскэй пууну үлэҕэ киллэрэр былааннанар.

Бары эбийиэктэр модульнай технологиялары туһанан тутуллуохтара. Бары бырайыактарга хантараактар номнуо түһэрсилиннилэр, СӨ Доруобуйаҕа харыстабылын министиэристибэтэ иһитиннэрэр.

Билиҥҥи туругунан икки эбийиэк үлэҕэ киирдэ: Графскай Биэрэк сэлиэнньэтигэр фельдшерскэй-акушерскай пуун уонна Нам улууһун Майаҕас сэлиэнньэтигэр фельдшерскэй пуун.

Сыл бүтүөр диэри өссө биэс эбийиэк тутуутун түмүктүүр былааннанар, ол иһигэр Казачье сэлиэнньэтигэр быраас амбулаториятын, Дьааҥы бөһүөлэгэр, Усуйаана улууһун Хайыр, Аллайыаха улууһун Оленегорскай, Булуҥ улууһун Сииктээх сэлиэнньэлэригэр  — ФАП-тары.

«Эбийиэктэр биһиги дойдубут Бэрэсидьиэнэ Владимир Путин көҕүлээһининэн «Уһун уонна көхтөөх олох» национальнай бырайыак чэрчитинэн, «Саха Өрөспүүбүлүкэтин доруобуйатын харыстабылын сайыннарыы» уонна «Саха Өрөспүүбүлүкэтин Арктикатааҕы зонатын уонна хотугу аҕыйах ахсааннаах төрүт олохтоох норуоттарын сайыннарыы» бырагыраамаларынан тутуллаллар.

Өрөспүүбүлүкэ үгүс улуустарыгар бу бырагыраама, ону тэҥэ «Доруобуйа харыстабылын бастакы сүһүөҕүн саҥардыы» бырагыраама көмөтүнэн саҥа ФАП-тар, быраас амбулаториялара тутулуннулар, хапытаалынай өрөмүөннэр ыытылыннылар, аныгылыы тэрил, массыына кэллэ. Доруобуйа харыстабылын инфраструктуратын саҥардыы хотугу сирдэр килиимэттэрин уонна логистикаларын уратыларын учуоттаан, түһүмэҕинэн салҕанар», — диэн СӨ Доруобуйаҕа харыстабылын миниистирэ Лена Афанасьева иһитиннэрдэ.

Хаҥалас улууһун Төхтүр сэлиэнньэтин олохтооҕо, СӨ үөрэҕириитин туйгуна, СӨ учууталларын учуутала, РФ үөрэҕириитин бочуоттаах үлэһитэ Елена Соломонова бэлиэтээбитинэн, былырыын бэс ыйыгар кини дойдутугар саҥа холобурдаах фельдшерскэй-акушерскай пуун үлэҕэ киирбит.

«Кини кыра, табыгастаах, наадалаах мэдиссиинэ тэрилинэн барытынан хааччыллыбыт, эмтиэкэлээх уонна ордук суолталааҕа – сылаас. Сэлиэнньэ олохтоохторо Бэрэсидьиэн Владимир Путиҥҥа «Доруобуйа харыстабыла» национальнай бырайыак чэрчитинэн маннык суолталаах бырайыагы олоххо киллэрбитин иһин, дьон доруобуйатын туһугар кыһамньытын, олох хаачыстыбатын тупсарбытын, гражданнар этэҥҥэ олорууларын хааччыйбытын иһин махталларын тиэрдэллэр», – диэн кини саҥа ФАП туһунан кэпсээтэ.

«Биһиги Чапаево сэлиэнньэбитигэр ФАП  былырыын  от ыйыгар арыллыбыта. Бу үөрүүлээх түгэни биһиги олус өр күүппүппүт! ФАП арыллыыта олохтоохторго дьиҥнээх быыһал буолла. Бу ордук кырдьаҕастарга уонна кыра оҕолоох ийэлэргэ наадалаах. Дьиэ иһэ сылаас,санузеллаах, барыта ыарыһах туһугар табыгастаахтык оҥоһуллубут. Дьиэ аныгылыы тэрилинэн хааччыллыбыт, биэлсэр уонна акушерка куруук миэстэлэригэр бааллар. Биһиги бэйэбитигэр эрэллээх курдук сананныбыт — ыалдьартан куттаммаппыт, тоҕо диэтэххэ аттыбытыгар мэдиссиинэ көмөтө баарын билэбит. РФ Бэрэсидьиэнин Владимир Путин сорудаҕынан үлэлиир национальнай бырайыак уонна ФАП-тары тутуу бырагырааматын олоххо киллэрии түмүгэр, тыа сирин нэһилиэнньэтигэр мэдиссиинэ көмөтүн ылыы чэпчиир уонна хаачыстыбата тупсар. Бырайыагы олоххо киллэрбит бары дьоҥҥо – өрөспүүбүлүкэ, улуус салалтатыгар уонна бары исписэлиистэргэ маннык кэрэ, аныгылыы уонна наадалаах дьиэ иһин улахан махтал!» — диэн үөрүүтүн Хаҥалас улууһун Чапаево сэлиэнньэтин олохтооҕо Матрена Дмитриева үллэһиннэ.