Быйыл биир кэлим эксээмэни 8157 киһи туттарыаҕа

Судаарыстыбаннай түмүктүүр аттестацияҕа бэлэмнэнии туһунан пресс-конференцияҕа иһитиннэрбиттэринэн, биир кэлим эксээмэни туттарааччылартан 67,2 % уустугурдуллубут математиканы, 38,1 % обществознаниены талбыт.

Эксээмэн туттарааччылар маннык биридимиэттэри талбыттар: 67,2 % — математиканы (уустугурдуллубут), 32,3 % — математиканы (судургутутуллубут), 38,1 % — обществознаниены, 19,3 % — информатиканы уонна ИКТ, 16,6 % —  биологияны, 13,7 % — историяны, 11,3 % — физиканы, 10,4 % — аангылыйа тылын, 10,5 % — химияны, 10,3 % — литэрэтиирэни, 2,1 % — географияны, 0,3-түү % — ньиэмэс, кытай тылларын. Нуучча тыла, математика булгуччулаах эксээмэннэр буолаллар, онон аттестат ылар туһугар бары туттараллар.

Быйыл биир кэлим эксээмэни (ЕГЭ) барыта 8157 киһи туттарарын туһунан сайаапка ыыппыт, итинтэн бу сылга оскуоланы бүтэрээччитэ – 7568 оҕо, доруобуйаларынан хааччахтаах — 215. Эксээмэн тутар пууҥҥа 6503 киһи үлэлиир. Бары үөрэҕи, бэлэмнэниини ааспыттар.

Үөрэх уонна билим миниистирэ Ирина Любимова: “Күн бүгүн эксээмэн тутар пууннар, үлэһиттэр эксээмэн хампаанньатыгар олоччу бэлэммит.  Өрүү буоларын курдук эксээмэни үрдүк тэрээһиннээхтик, кырдьыктаахтык ыытыахтаахпыт.

Эксээмэннэр кэмнэригэр биэдэмэстибэлэр икки ардыларынааҕы хамыыһыйа үлэлиир, өрөспүүбүлүкэҕэ улахан тыалынан, баһаарынан, уу кэлиитинэн, уот барыытынан сибээстээн атахтааһын тахсар түгэнигэр суһаллык быһаарыахтаахпыт. Ааспыт сылларга хамыыһыйа уонна департаменнар чилиэннэрэ табыгастаахтык үлэлээн, түмүктүүр судаарыстыбаннай аттестация ыытыллыытын болдьоҕун бэрээдэгэ барыта тутуһуллубута. Быйыл даҕаны табыллан үлэлиирбитигэр эрэллээхпин”, — диэн эттэ.

Барыта 223 эксээмэн тутар пуун үлэлиэҕэ, итинтэн 11 пуун оһуобай усулуобуйалаах (УФСИН – 2, дьиэҕэ — 8).