Быйыл Бырабыыталыстыба отчуотугар 27 тыһыынча киһини хаппыттар

Дьаҥынан сибээстээн тохтуу сылдьыбыт СӨ Бырабыыталыстыбатын отчуотун быйыл сөргүттүлэр. Бүгүн Саха сирин тэлэбиидэнньэтигэр, араадьыйатыгар Бырабыыталыстыба отчуотун түмүктүүр эпиирэ буолла.  

“Биһиги 400-тэн тахса нэһилиэнньэлээх пууҥҥа сырыттыбыт. Манна 27 тыһыынчаттан тахса өрөспүүбүлүкэ олохтооҕо кытынна. Отчуот олоҕурбут көрүҥүнэн ыытыллыыта бары улуустар бэрэстэбиитэллэрин кытта көрсөргө кыаҕы үөскэттэ. Бу олохтоохтору кытта ыкса ситими олохтуур”, — диэн СӨ Бырабыыталыстыбатын бэрэссэдээтэлэ Андрей Тарасенко эттэ.

Кини Арктика улууһа хайдах олорорун, туох кыһалҕалааҕын, хоту таһаҕаһы таһыы, уо.д.а. боппуруостары билсээри Булуҥ улууһугар отчуокка сылдьыбыт. Ону тэҥэ, тыа хаһаайыстыбатын боппуруоһун иҥэн-тоҥон көрөөрү, бу салаанан утумнаахтык дьарыктанар Чурапчы улууһугар отчуокка кыттыбыт. Быһа эпиир кэмигэр бэрэссэдээтэл бу туһунан сырдатта.