Быйыл Чурапчыга 100 миэстэлээх балыыһа комплексын тутуохтара

Ил Дархан Айсен Николаев Чурапчы улууһугар «Доруобуйа харыстабыла» национальнай бырайыак чэрчитинэн сүүс миэстэлээх П.Н. Сокольников аатынан балыыһа комплексын тутуутун бэрэбиэркэлээтэ.

«Эбийиэк быйыл ахсынньыга туттарыллара былааннанар. Билигин Чурапчы медицинскэй тэрилтэлэрэ араас объектарга бааллар. Саҥа балыыһа үлэҕэ киирдэҕинэ, дьон биир миэстэҕэ кэлэн, доруобуйаларын көрдөрөр буолуохтара», — диэтэ Айсен Николаев. 

Чурапчы улууһун киин балыыһатын сүрүн бырааһа Николай Сивцев бэлиэтээбитинэн, билиҥҥитэ эбийиэк 71% бэлэм. Бүгүҥҥү күҥҥэ тутааччылар комплекс ис үлэтин оҥоро сылдьаллар.

Ил Дархан эбийиэги кэмигэр тутан бүтэрэргэ, чугастыы сытар тэлгэһэни тупсарарга уонна каадырдары бэлэмнээһин боппуруостарын хонтуруолга тутарга сорудахтаата.