Быйыл «ДАРХАН УУС» ким буолуоҕай?

Сарсын, олунньу 22 күнүгэр, «ДАРХАН УУС» Саха сирин тимир уустарын XIV сүрүн быыстапката «Куруһаала» эргиэн эрээттэригэр Олоҥхо дойдутун тимири ыллатар уран уустарын түмүөҕэ.

Бу сырыыга өрөспүүбүлүкэ улуустарыттан 60 маастар кыттара күүтүллэр. Тэрээһин саха аныгы тимир уустарын ускуустубатын сөргүтээччи уонна тарҕатааччы Борис Неустроев-Мандар Уус аатын кытта быһаччы ситимнээх. Улуу Кыайыы 80 сылыгар, тимир ууһа, этнограф, СӨ Тимир уустарын Сойуустарын бочуоттаах бэрэссэдээтэлэ, П.А. Ойуунускай аатынан бириэмийэ лауреата, СӨ, Таатта улууһун, Баайаҕа нэһилиэгин Бочуоттаах олохтооҕо Борис Неустроев-Мандар Уус 80 сааһыгар ананар.

Тимир уустар ортолоругар «Бастыҥ уус-уран оҥоһуулаах быһах», «Бастыҥ ас быһаҕа», «Дэгиттэр быһах» хайысхаларга чулууттан чулууну талан быһаарыахтара. Оттон бары тургутууну ааспыт тимир ууһа «ДАРХАН УУС» аатын сүгүөҕэ.
«Бастыҥ ас быһаҕа» хайысхаҕа дьүүллүүр сүбэҕэ саха төрүт аһын сөргүтээччи Иннокентий Тарбахов үөрэнээччилэрэ кыттыахтара. Онтон атын хайысхаларга саха быһаҕын аар саарга аатырдыбыт Сарыал Билюкин, СӨ тимир уустарын сойууһун бэрэссэдээтэлэ Роман Готовцев-Мындыр Уус, Россия ойуулуур-дьүһүннүүр академиятын чилиэн-кэрэспэдьиэнэ Дьулустаан Бойтунов уо.д.а. дьүүллүөхтэрэ.