Быйыл Дьокуускайга 31 км суол өрөмүөннэниэҕэ

2024 сылга «Куттала суох хаачыстыбалаах суоллар» национальнай бырайыак иитинэн,  Саха сиригэр  175 км  уһуннаах  массыына суолун саҥардан, өрөмүөннээн үлэҕэ киллэрии былааннанар. Бу туһунан СӨ бырабыыталыстыбатын бэрэссэдээтэлин бастакы солбуйааччыта    Дмитрий Садовников сүбэ-мунньахха иһитиннэрбитин туһунан СИА суруйар.

Бу  175 килэмиэтиртэн 31-рэ Дьокуускай куоракка. Санатан эттэххэ, киин куоракка Можайскай уулуссаны саҥардан оҥоруу үлэтэ түмүктэниэхтээх. Итиэннэ  Сэбиэскэй Аармыйа 50 сыла уулусса хапытаалынай өрөмүөнэ саҕаланыахтаах.

Кэнники сылга бары көрө-билэ сылдьарбыт курдук, дойду Аҕа баһылыга Владимир Путин көҕүлээбит «Куттала суох хаачыстыбалаах суол» национальнай бырайыагынан суолу тутуу тэтимнээхтик баран эрэр. Былырыын 415-тэн км тахса саҥа суол үлэҕэ киирбитэ, оттон 2018 сылтан 3 тыһыынчаттан тахса усталаах суол чөлүгэр түһэрилиннэ.