Быйыл Өймөкөөҥҥө ыытыллар Олоҥхо ыһыаҕын логотиба бигэргэннэ

Бу күннэргэ Тымныы полюһугар Өймөкөөн улууһугар ыытыллар Олоҥхо ыһыаҕын логотиба бигэргэннэ.

Улуустааҕы култуура управлениетын салайааччытын солбуйааччы Мария Максимова логотип суолтатын бу курдук быһаарда:

— Суолталаах бэлиэ сүрүн ис хоһооно – айылҕаҕа буола турар уларыйыы, хамсааһын, олох эргиирэ. Онон Өймөкөөҥҥө ыытыллар Олоҥхо ыһыаҕын сэттэ тосхолун сүрүн идиэйэтин толору арыйар. Айылҕа уларыйыытын түөрт кэмэ – киһи-аймах Ийэ айылҕаны ыкса сибээһин бэлиэтэ, ситимэ. Ортоку — аҕыс салаалаах Улуу Тиит — Аал Луук Мас. Силигилии турар айылҕаҕа харыстабыллаах сыһыаҥҥа ыҥырар логотип ааптара — Уус Ньаратааҕы Култуура дьиэтин худуоһунньуга Юлия Попова. Айылҕа түөрт кэмин олбоххо ойуулааһын ааптара — Өймөкөөн улууһун Сордоҥноох нэһилиэгиттэн төрүттээх,  СӨ ойуулуур-дьүһүннүүр ускуустубатын маастара, Горнай улууһун норуотун маастара Татьяна Константинова-Аммосова.

Өймөкөөн улууһугар ыытыллар Олоҥхо ыһыаҕа сэттэ идиэйэттэн турар. Онтон сүрүннэрэ — айылҕа харыстабыла, экология тиэмэтэ.