Быйыл Хабылык уонна хаамыска чөмпүйэнээтигэр бүлүүлэр кыайыылаах таҕыстылар

Бүлүү оройуона Хабылык уонна хаамыска чөмпүйэнээтигэр бастакы миэстэни ыллылар.
24 хамаандаттан 180-тан тахса кыттааччы 80 путевка иһин кииристилэр, диэн чөмпүйэнээт сүрүн судьуйата Иннокентий Максимов СИА-ҕа иһитиннэрдэ.

«Бастакы миэстэни — Бүлүү оройуонун хамаандата, иккис миэстэни — Мэҥэ Хаҥалас оройуона, үсүһү – Дьокуускай куорат ыллылар. Барыта «Манчаары оонньууларыгар» 80 путевка оонньоонно. Абсолютнай оонньууга эр дьон ортотугар 20 спортсмен кытынна. Бастакы миэстэни Ньурба оройуонуттан Ньургун Семенов ылла. Дьахталлар ортолоругар Нам оройуонуттан Рената Захарова бастакы миэстэҕэ таҕыста. Чөмпүйэнээккэ хоту оройуоннартан кыттааччылар элбээбитэ үөрдэр. Бу успуорт бу көрүҥэ сайдарын көрдөрөр», — диэн Иннокентий Максимов кэпсээтэ.

Санатан эттэххэ, сахалыы остуол оонньуулара 2017 сылтан «Манчаары оонньууларын» бырагырааматыгар киллэриллибиттэрэ.