Быйыл кыһын устата буулаабыт бөрөлөрү өлөрбүттэр

Адьырҕа кыыллар хаһаайыстыбалаах дьоҥҥо улахан хоромньуну оҥороллор. Булуҥҥа быйыл кыһын устата ыстааданы буулаабыт бөрөлөрү өлөрбүттэр.

— Биһиги тэрилтэбитигэр быйылгы кыһын судургута суох буолла. Адьырҕа кыыллар кыһын устата табаларбытын сойуоластылар. Соторутааҕыта 4-с нүөмэрдээх ыстаадаҕа 7 бөрө чугаһаата. Онон табаһыттарбыт табаларын көмүскүүр инниттэн бултаһа тахсарга күһэлиннилэр.

Тэрилтэбит түөрт ыстаадатыттан бөрөлөр үһүгэр буулаабыттара. Сатабыллаах, кыраҕы харахтаах булчуттардаах буолан бөрөлөрү 3-с нүөмэрдээх ыстаада биригэдьиир-табаһыта Семен Корякин, 4-с нүөмэрдээх ыстаадаҕа тэрилтэбит үлэһиттэрэ Алексей Марков уонна Павел Никитин бултаатылар. Инньэ гынан, ыстаадаҕа икки адьырҕаны өлөрдүлэр, – диэн “Булуҥ” тэрилтэ телеграм-ханаалыгар иһитиннэрэллэр.

Быйыл бөрөлөр хаһааҥҥытааҕар даҕаны баламаттар, оннооҕор Күһүүр сэлиэнньэтигэр адьас ыга кэлбит үс бөрөнү тэрилтэбит үлэһиттэрэ Алексей Попов, Павел Никитин, Дьулустаан Никитин бултабыттара диэн суруйаллар.

“Биһиги диэки бөрөнү бултуур олус уустук. Тулабыт барыта булгунньах, хайа. Бураан тыаһын иһиттилэр даҕаны өрө диэки бара тураллар, онно тиэхиньикэ кыайан тиийбэт. Төһө да уустугун иһин, табаһыттарбыт маастарыстыбаларын, дьүккүөрдэрин көрдөрүлэр” – диэн этэллэр.

Ыстаадаҕа чугаһаабыт адьырҕа кыылы бултааһын иһин тэрилтэ биир бөрө төбөтүгэр 100 000 солк. биэриэҕэ диэн суруйаллар.