Быйыл кырдьаҕастарга аналлаах саҥа интэринээт-дьиэ аһыллыаҕа

Мэҥэ Хаҥалас улууһун  Матта сэлиэнньэтигэр саҥа эбийиэк “Демография” национальнай бырайыак чэрчитинэн тутуллар.

51 куойка-миэстэлээх интэринээт-дьиэ кырдьаҕастар уонна доруобуйаларынан хааччахтаах  дьон сылы быһа олороллоругар аналлаах. Икки мэндиэмэннээх, 5 тыһыынча кв.м.  тахса уопсай иэннээх дьиэ икки блоктаах: олорор уонна уопсай.

Бастакы этээскэ кэлээскэлээх инбэлииттэргэ икки миэстэлээх 3 олорор хос көрүллэр. Ону сэргэ 46 миэстэлээх остолобуой баар. Үлэнэн терапияҕа аналлаах столяр-силиэсэр мастырыскыайа, таҥас сууйар сир, тиэхиньиичэскэй хостор бааллар.

Онтон 2-с этээскэ мэдиссиинэ көмөтүн оҥорор, култуурунай-маассабай уонна физкултууранан дьарыктанар, куруһуоктар ыытыллар уонна дьаһалта хосторо бааллар. Актовай саала 42 олорор миэстэлээх.

Санатан эттэххэ, аныгы интэринээт дьиэлэр Томмокко, Бүлүүгэ, Өлүөхүмэҕэ уонна Намҥа үлэҕэ киллэриллибиттэрэ.