Быйыл ойуур баһаарын бохсууга 5,7 млрд солк. көрүлүннэ

2025 сылга Саха сиригэр ойуур баһаарын бохсууга 5,7 миллиард солкуобай үп-харчы көрүлүннэ.

СӨ Ил Дарханын уонна Бырабыыталыстыбатын пресс-сулууспатын иһитиннэриитинэн, итинтэн 4,35 млрд тахса солк. харчы федеральнай бүддьүөттэн, өссө 1,3 млрд солкуобай тахса үп-харчы эрэгийиэннээҕи бүддьүөттэн ороскуоттанар. Үбүлээһини ойуур баһаарын умуруорууга, авиамониторинг тиһигин сайыннарыыга, «Авиалесоохрана» СБТ авиационнай салааларын оҥорууга уонна бөҕөргөтүүгэ ыытыахтара. Бу туһунан СӨ Экологияҕа, айылҕаны туһаныыга уонна ойуур хаһаайыстыбатын министиэристибэтэ иһитиннэрдэ.

Ол иһигэр тирээн турар соруктарынан биэс саҥа авиаотделениелар, олортон иккитэ Арктика зонатыгар тэриллиэхтэрэ: Орто Халымаҕа уонна Белай Гораҕа. Атыттар Витим, Саҥыйахтаах уонна Эдьигээн нэһилиэнньэлээх пууннарыгар аһыллыахтара. Бары тэрээһиннэр бигэргэммит суол карталарынан уонна болдьохторунан оҥоһуллаллар. Билигин икки бастакы авиаотделениены Өлүөхүмэ уонна Ленскэй оройуоннарын тэрийии үлэтэ көхтөөхтүк барар.

Быйыл олунньу ыйтан баһаарынай тэрилтэлэр үлэһиттэрэ теоретическай бэлэмнээһини уонна хос бэлэмнээһини ааһаллар. Итини кытта үлэһиттэргэ да, саҥа исписэлиистэргэ да буоллун, тургутар эрчиллиилэр ыытыллаллар. Бэлэмнэнии дьаһалларга «Авиалесоохрана» СБТ 700-чэ үлэһитэ кытталлар. Былаан быһыытынан ыксаллаах быһыыга- майгыга 5676 киһи уонна 1 779 тиэхиньикэ үлэлиэҕэ.

Санатан эттэххэ, федеральнай киин көмөтүнэн эбии үбүлээһин кыаллар буолла. Дойду Бэрэсидьиэнэ Владимир Путин Саха сиригэр кэлэ сырыттаҕына Ил Дархан Айсен Николаев ойуур баһаардарын бохсуу туһунан дакылааты билиһиннэрбитэ уонна үбү-харчыны улаатыннарарга көрдөспүтэ. Бэрэсидьиэн көҕүлээһини өйөөбүтэ, ол түмүгэр федеральнай үбүлээһин 2025 сылтан сылга 1,6-тан 4,3 миллиард солкуобайга диэри үрдээбитэ. Бу өйөбүл таһыма инникитин 2026 уонна 2027 сылларга оннунан хаалыаҕа.

Үбүлээһин улаатыыта өрөспүүбүлүкэ бүддьүөтүгэр эмиэ көрүлүннэ. 2024 сылга Саха сирин ойуур хаһаайыстыбатын харыстааһыҥҥа 1 миллиард солкуобайтан тахса сууманы ыытар эбит буоллаҕына, 2025 сылга 1,3 миллиард солкуобайга тиийбит. Ол курдук, 2025 сылга ойуур баһаарын бохсууга үбүлээһинин кээмэйэ 5,7 млрд солк. кэриҥэ буолуоҕа.