Быйыл орто үөрэх кэнниттэн үрдүккэ туттарсааччыларга уларыйыы киирдэ

Быйыл тохсунньуттан орто үөрэх кэнниттэн үрдүк үөрэххэ туттарсааччыларга уларыйыы киирдэ. Туох?

Орто үөрэҕи бүтэрбиттэр эрдэ ылбыт идэлэрэ туттарсар үөрэхтэрин исписээлинэһигэр сөп түбэһэр эрэ түгэнигэр үрдүк үөрэх бэйэтин тургутууларын ааһан үөрэххэ киирэр кыахтаахтар. Үөрэхтэрэ сөп түбэһэрин дуу, суоҕун дуу хас биирдии университет, институт бэйэтэ быһаарар. М.К.Аммосов аатынан Хотугулуу-Илиҥҥи федеральнай университекка туттарсааччылар идэлэрэ сөп түбэһэрин, суоҕун университет киин тутар хамыыһыйатын саайтыгар киирэн классификаторга бэрэбиэркэлиир кыахтаннылар.

“Орто үөрэҕи бүтэрээччилэр үрдүк үөрэххэ туттарсар хайысхаларын (профиль) эрдэттэн билсэ туралларын уонна уопсайынан, кэллиэскэ ылбыт идэлэрэ сөп түбэһэрин, суоҕун билэллэрин туһугар, ХИФУ сыыппараҕа технологиятын департамена уонна киин тутар хамыыһыйа классификатор оҥорон үлэлэттилэр. Бу абитуриент орто үөрэҕин үрдүк үөрэҕи кытта тэҥнээн көрөрүгэр көмөлөһүөҕэ. Абитуриент орто үөрэҕин идэтин аатын эрэ суруйара ирдэнэр, бырагыраама бакалавриат, специалитет ханнык бырагыраамалара сөп түбэһэллэрин бэйэтэ булан таһаарар” – диэн киин тутар хамыыһыйа иһитиннэрбитин пресс-сулууспа суруйар.

Өскөтүн абитуриеннар орто анал үөрэхтэрин идэлэриттэн атын хайысхалаах үрдүк үөрэххэ туттарсар түгэннэригэр, биир кэлим эксээмэн (ЕГЭ) түмүгэ ирдэнэр. Биллэрин курдук, биир кэлим эксээмэни туттарар туһунан сайабылыанньаны 2026 сыл олунньу 1 күнүгэр эрэ диэри ылаллар. Этэргэ дылы, икки үлэ күнэ эрэ хаалла (тохсунньу 30 уонна олунньу 2 күннэрэ). Бу ордук быйыл орто үөрэҕи бүтэрээри сылдьар, салгыы үрдүккэ туттарсарга сорунар устудьуоннарга улахан суолталаах. Идэлэрэ сөп түбэһэрин бэрэбиэркэлэммэккэ, биир кэлим эксээмэҥҥэ ханнык биридимиэттэри туттаралларын туһунан сайабылыанньаларын биэрбэккэ хааллахтарына, ытыстарын соттуохтарын, биир сыллара халтай хаалыан сөп. Онон тиэтэйиҥ.