Быйыл Саха сиригэр 267 км суолу оҥоруохтара

Бу сылга «Куттала суох уонна хаачыстыбалаах суоллар» национальнай бырайыак чэрчитинэн өрөспүүбүлүкэҕэ 267 км суол үлэҕэ киириэхтээх — 244 км эрэгийиэннээҕи суол уонна 23 км Дьокуускай куорат уулуссаларын суола. Ол туһунан СӨ тырааныспарка уонна суол хаһаайыстыбатыгар министиэристибэтин суол сулууспатын уонна массыына тырааныспарын департаменын салайааччыта Александр Данилов иһитиннэрдэ.

«Билиҥҥи туругунан, хантараактар барыта түһэрсиллибиттэрэ. Бэдэрээттиир тэрилтэлэр тиэхиньикэлэрэ уонна үлэһиттэрэ бэлэмнэр. Бу күннэргэ эбийиэктэргэ үлэ саҕаланыаҕа», — диэн Александр Данилов бэлиэтээтэ.

Эрэгийиэннээҕи суоллары оҥорорго барыта 4,9 млрд солк. үп көрүллүбүт. Ол иһигэр 3,7 млрд солкуобай  — федеральнай бүддьүөттэн, 1,2 млрд солкуобай — Саха сирин суолларын пуондатыттан.

Оттон киин куорат суолларын оҥоруутугар барыта 2,3 млрд солкуобай көрүллэр. Федеральнай бүддьүөт — 0,5 млрд солкуобай, Саха сирин суолларын пуондата — 1,3 млрд солкуобай уонна Дьокуускай куорат үбэ — 0,5 млрд солкуобай.