Быйыл Саха сиригэр 50 мөлүйүөн туоннаттан тахса чоҕу хостуур былааннанар

Балаҕан ыйын 27 күнэ – Саха Өрөспүүбүлүкэтин Судаарыстыбаннаһын күнүгэр Ил Дархан Айсен Николаев «Быһа лииньийэ» кэмигэр Саха сиригэр саҥа рекорд олохтоммутун туһунан үөрүүлээх сонуну иһитиннэрдэ.  

Ил Дархан бэлиэтээбитинэн, биһиги өрөспүүбүлүкэбит Арассыыйаҕа чоҕу хостооһуҥҥа иккис, оттон Уһук Илиҥҥи федеральнай уокурукка бастакы миэстэни ылар.

2025 сылга Саха сиригэр 50 мөлүйүөн туоннаттан тахса чоҕу хостуур былааннанар. Бу туһунан Айсен Николаев Судаарыстыбаннас күнүгэр анаммыт «Быһа лииньийэ» кэмигэр эттэ. Өрөспүүбүлүкэ баһылыга эрэгийиэн Арассыыйаҕа чох хостооһунугар иккис уонна Уһук Илиҥҥи федеральнай уокурукка бастакы миэстэни ыларын тоһоҕолоото.

«Устуоруйаҕа бастакытын быйыл Саха сиригэр чох хостооһуна 50 мөлүйүөн туоннаны куоһарыаҕа. Өссө сэттэ сыл анараа өттүгэр биһиги 14-15 мөлүйүөн туонна кэриҥин хостуур этибит, оттон бүгүн хас да төгүл үүнүүгэ таҕыстыбыт: ааспыт сылга – 49 мөлүйүөн туонна, быйыл 51-52 мөлүйүөн туонна хостоноро күүтүллэр. Бу – күүрээннээх үлэ, кэскили түстүүр дьулуур. Маннык түмүктэри хас эмэ көлүөнэ шахтердар бэйэлэрин харыстаммакка үлэлэрин түмүгүнэн ситиһилиннэ. Кинилэр кыһамньыларынан итинник үрдүк көрдөрүү ситиһилиннэ», — диэн этэ Айсен Николаев.

Айсен Николаев ону таһынан Чуумпу акыйаан тимир суолун тутуутун холобурдаата, ону Арассыыйа Бэрэсидьиэнэ Илин экэнэмиичэскэй пуорумҥа арыйбыта.

Өрөспүүбүлүкэ Ил Дархана Нерюнгри сайдыытыгар уонна куорат маастар-былаанын олоххо киллэрии туһунан кэпсээтэ. Кини социальнай эбийиэктэр тутуулара уонна хапытаалынай өрөмүөннэр бара туралларын, доруобуйа харыстабылын систиэмэтин саҥардыы ураты суолталааҕын бэлиэтээтэ.