Быйыл Саха сиригэр 50-тан тахса научнай бырайыак үбүлэниэ

2026 сылга Саха сиригэр 50-тан тахса научнай бырайыак өйөбүлү ылыаҕа. Бу туһунан Үөрэх уонна билим миниистирин солбуйааччыта Михаил Присяжнай социальнай ситимнэринэн быһа эпииргэ иһитиннэрдэ.

СӨ Айсен Николаев Саха сиригэр 2035 сылга диэри социальнай-экэнэмиичэскэй уонна научнай-технологическай сайдыытын стратегиятын олохтуур сүрүн хайысхалары бэлиэтээтэ. Олор истэригэр – федеральнай бэбиэскэни учуоттаан тырааныспар салаатын сайыннарыы, экэниэмикэ бары салааларыгар наадалаах энергетика уонна энергияны кэмчилиир технологиялар, ону таһынан геологияны сайыннарыы бырайыактарыгар өрөспүүбүлүкэ научнай кэлэктииптэрин кыттыыта ирдэнэр.

«Былырыын ахсынньыга Арассыыйа научнай пуондатын кытта түһэрсиллибит сөбүлэһии чэрчитинэн, 2026 сылга өрөспүүбүлүкэ кэлэктииптэрин 50-тан тахса научнай бырайыактарыгар бастыҥ хайысхаларынан өрөспүүбүлүкэ бүддьүөтүттэн да, федеральнай үбүлээһинтэн да өйөбүл көрүллэрэ былааннанар», – диэн Михаил Присяжнай бэлиэтээтэ.

Миниистир солбуйааччыта эппитинэн, оҥоһуу өйү сайыннарыы уонна экэнэмиэкэ салааларын технологическай лидерствотын хааччыйыы боппуруостарыгар ураты болҕомто ууруллар. Кини бу сыаллары ситиһэргэ бары таһымнарга, билимтэн уонна үөрэхтээһинтэн саҕалаан, экэниэмикэ дьиҥнээх хайысхалагыр оҥоһуулары быраактыкаҕа киллэриигэ тиийэ тиһиктээх үлэ ыытыллара наадатын бэлиэтээтэ.

«2026 сыл Арассыыйаҕа Норуоттар сомоҕолоһууларын сылынан, оттон Саха Өрөспүүбүлүкэтигэр  – Култуура сылынан биллэрилиннэ, бу билим, үөрэх уонна гуманитарнай чинчийиилэр сайдыыларын кэҥэтиигэ эбии кыаҕы биэрэр», – диэтэ Михаил Присяжнай.

Кини 2026 сыл эрэгийиэн наукатын уонна үрдүк үөрэҕин систиэмэтигэр үбүлүөйдээх сылынан буоларын бэлиэтээтэ. Дьокуускайдааҕы судаарыстыбаннай университет үлэтэ саҕаламмыта 70 сыла, Арктикатааҕы судаарыстыбаннай агротехнологическай университет аатынан биллэр үрдүк аграрнай үөрэхтээһин 70 сыла, ону таһынан аграрнай билим тэриллибитэ 70 сыла туолар.