Быйыл Саха сиригэр “Тыа сирин кэлимник сайыннарыы” бырагырааманан 12 эбийиэги үлэҕэ киллэриэхтэрэ

Быйыл Саха сиригэр “Тыа сирин кэлимник сайыннарыы” бырагырааманан хапытаалынай тутуу 12 эбийиэгин үлэҕэ киллэриэхтэрэ.

“Тыа сирин кэлимник сайыннарыы” судаарыстыбаннай бырагыраама тыа сирин нэһилиэнньэлээх пууннарын кэлимсэтик сайыннарар кыаҕы биэрэр. Ол курдук, сэлиэнньэлэргэ олорор дьиэ эрэ буолбакка, социальнай эбийиэктэр тутуллаллар, тупсарыыга үлэ барар”, — диэн Ил Дархан Айсен Николаев бэлиэтиир.

Бырагыраама иитинэн быйыл Саха сиригэр кэккэ оскуолалары үлэҕэ киллэриэхтэрэ: Бүлүү улууһун Уһун сэлиэнньэтигэр 150 миэстэлээх, Чурапчы улууһун Мындаҕаайы сэлиэнньэтигэр 120 миэстэлээх, Уус Алдан улууһун Сыырдаах сэлиэнньэтигэр 120 миэстэлээх, Хаҥалас улууһун Үөдэй сэлиэнньэтигэр 60 миэстэлээх.

Ону тэҥэ, Бүлүү улууһун Күбэйиҥдэ уонна Уус Алдан улууһун Үс Күөл сэлиэнньэлэригэр уһуйааннар, Сунтаар улууһун Сунтаар сэлиэнньэтигэр бассейннаах успуорт комплекса үлэҕэ киирэллэр.

Ону таһынан, Бүлүү улууһун Сатаҕай уонна Үөһээ Бүлүү улууһун Липпэ Атах сэлиэнньэлэригэр эдэр исписэлиистэргэ түөрт кыбартыыралаах икки олорор дьиэни киллэрэллэрэ былааннанар. Бартыһаан сэлиэнньэтигэр – 50 дьиэлээх “Мымах” кыбартаалы. Уус Алдан улууһун Сыырдаах сэлиэнньэтигэр уу ситимин, оттон Үөһээ Бүлүү улууһун Харыйалаах сэлиэнньэтигэр элбэх хайысхалаах успуорт былаһаакката тутуллар.

Ону тэҥэ, сатыы киһи сылдьар суолун-ииһин тупсарыахтара, ол иһигэр Быракаан сэлиэнньэтин култууратын-успуордун комплексыгар, Нам улууһун Харыйалаах уонна Таатта улууһун Булуҥ сэлиэнньэтигэр “Эрэл” успуорт комплекс тротуардарын, аллеяларын, бэлэсипиэт суолун, ыллыктарын, Үөһээ Бүлүү улууһун Нам сэлиэнньэтигэр Аҕа дойду Улуу сэриитин кыттыылаахтарын мэҥэ бэлиэтигэр тупсарар үлэлэр барыахтара.

Бырагырааманы олоххо киллэрии салҕанар. Быйыл 9 эбийиэк хапытаалынай тутуута саҕаланыа, олор истэригэр Михайловка сэлиэнньэтигэр 150 миэстэлээх Норуот айымньытын дьиэтэ, Амма улууһун Алтан сэлиэнньэтигэр култуура дьиэтэ, Үөһээ Бүлүү улууһун Харыйалаах сэлиэнньэтигэр уу ситимин тардыы, искусственнай бүрүөһүннээх успуорт универсальнай  былаһаакката саҕаланар.

Итиэннэ Нам улууһун Кириэс Кытыл сэлиэнньэтигэр элбэх оҕолоох ыал олорор кыбартаалын уонна Сунтаар улууһун Сунтаар сэлиэнньэтигэр “Өтөөкү” түөлбэ тутуутун саҕалыыр былааннаахтар.

Санатан эттэххэ, дойду Тыатын хаһаайыстыбатын министиэристибэтэ уонна өрөспүүбүлүкэ Бырабыыталыстыбата түһэрсибит сөбүлэҥнэрин иитинэн, быйыл Саха сиригэр бырагырааманы олоххо киллэриигэ 633 мөл. солк. кэриҥэ көрүллүбүтэ (федеральнай бүддьүөттэн – 578,47 мөл. солк., эрэгийиэн судаарыстыбаннай бүддьүөтүттэн –54,92 мөл. солк.).

Ил Дархан уонна Бырабыыталыстыба пресс-сулууспата.