Хаартыска: Саргын Скрябин, ЯСИА
Ил Дархан Айсен Николаев “Саха сирин тимир суоллара” хампаанньа 2025 сыллааҕы үбүн-хаһаайыстыбаннай үлэтин барыллаан түмүктэрин уонна 2026 сыллааҕы былаанын көрдө.
Быйыл хампаанньа дьону таһыытын улаатыннарбыт. Кэлэр сылга 464 тыһыынчаҕа диэри тиэрдэр соруктаах. Ил Дархан хампаанньа социальнай бэлиитикэни көхтөөхтүк ыытарын, кини көмөтүнэн бүгүн “Патриот” ыччат элбэх хайысхалаах киинэ үлэҕэ киирбитин бэлиэтээтэ.
Хампаанньа генеральнай дириэктэрэ Василий Шимохин иһитиннэрбитинэн, 2025 сылга таһаҕаһы тиэйии кээмэйэ 7,8 мөлүйүөн туоннаҕа тиийиэхтээх, бу 2024 сыллааҕы көрдөрүүттэн 91,9% уонна былааннаммыт кээмэйтэн 109% тэҥнэһэр.
“Хоту таһаҕаһы тиэйии чэрчитинэн хампаанньа таһаҕаһы тиэрдиини толору хааччыйда. Манна сүрүн оруолу биһиги Москва аттыгар баар бэйэбит Столбовой таһаҕас тиэйэр терминалбытыттан контейнердаах буойастары ыыта олорбуппут ылла. Өскөтө 2024 сылга 30 контейнердаах буойаһы ыыппыт буоллахпытына, 2025 сыл түмүгүнэн бу ахсаан 69-ка тиийиэҕэ», — диэтэ генеральнай дириэктэр.
Кини этэринэн, хампаанньа сүрүн оҥорон таһаарыытыгар инвестицияны угар кээмэйин улаатыннаран иһэр. 2026 сылга 4,4 млрд солкуобайга диэри улаатыннарар былааннаах, бу быйылгы таһымтан 2,6 төгүлүнэн улахан.
Инвестиция сүрүн хайысхаларыгар тимир суол инфраструктуратын тутар эбийиэктэр киирэллэр: Сквородино-Рейново линияны кытта холбуу Рейново ыстаансыйаны уонна Дьэлиҥдэ-Мохэ аһарар пуунун саҥаттан уларытыы оҥоһуллуохтаах. Ону кытта Чульбаас ыстаансыйатын кэҥэтиэхтээхтэр.
«Дьэлиҥдэ-Мохэ аһарар пууҥҥа бетон үлэтин 80% кэриҥин түмүктээтибит. Кыраныысса туорааһынын тутууга матырыйааллары тиэрдиини саҕалаатыбыт. Ыам ыйыгар туоруур сир бастакы пуунун бэрэбиэркэлииргэ погрничниктары уонна таможня үлэһиттэрин ыҥырар былааннаахпыт», — диир Василий Шимохин.
2026 сылга хампаанньа Алдан ыстаансыйатыгар локомотивнай депо оҥорон таһаарар кыамтатын салгыы кэҥэтэр, Аллараа Бэстээх ыстаансыйатыгар вагоннары өрөмүөннүүр пуунун хааччыйар былааннаах, диэн иһитиннэрэр Ил Дархан, бырабыыталыстыба пресс-сулууспата.
Ахсынньы 13-15 күннэригэр Москва куоракка «Твой Ход – 2025» Бүтүн Арассыыйатааҕы устудьуоннар пуорумнара ыытылларынан, «Сыл…
Дьокуускайга административнай дьиэҕэ тахсыбыт киһи өлүүлээх баһаар холуобунай дьыалатыгар бириигэбэри таһаардылар. Бу туһунан ахсынньы 16…
Бүгүн, ахсынньы 16 күнүгэр, Дьокуускайга Российскай Федерация бочуоттаах полярнигын Николай Находкин «Санников сиригэр эспэдииссийэ» диэн…
Өрөспүүбүлүкэ агробырамыысыланнай комплексын 2025 сыллааҕы үлэтин түмүктүүр мунньаҕар бастыҥ муниципальнай оройуоннар бэлиэтэннилэр. Бу туһунан СӨ…
Тымныыттан эчэйии үксэ арыгы иһииттэн тахсар диэн Өрөспүүбүлүкэтээҕи 2 №-дээх балыыһатын - Суһал мэдиссиинэ көмөтүн…
Тэрээһиннэргэ байыаннай дьайыы бэтэрээннэрэ уонна кыргыһыы хонуутугар охтубут дьон дьиэ кэргэттэрин чилиэннэрэ, барыта 28 тыһыынчаттан…