Быйыл сайын «Табыс» ыччат бэстибээлэ Кэбээйигэ ыытыллыаҕа

Быйыл сайын «Табыс» ыччат өрөспүүбүлүкэтээҕи бэстибээлэ Кэбээйи улууһугар ыытыллыаҕа. Бу туһунан быһаарыныыны бэҕэһээ, кулун тутар 30 күнүгэр, Ыччат министиэристибэтин кэллиэгийэтин кэмигэр ылыннылар.

Бэстибээл бэс ыйын 6-8 күннэригэр буолуоҕа.

«Табыс» бэстибээл Ыччат ыһыаҕын утумнуур тэрээһининэн буолар. Ыһыахтар өрөспүүбүлүкэ араас улуустарынан 1991 сылтан ыытыллаллар. Бэстибээл Саха сирин олохтоохторун духуобунай, култуурунай сыаннастарын харыстааһыҥҥа уонна патриоттуу иитиигэ туһуланар.

Бэстибээл аата Таптаа, Алҕаа, Байыт Ытык Сиргин диэн тыллар бастакы буукубаларыттан тахсыбыта.

Санатан суруйдахха, бэстибээл бүтэһигин 2018 сыллаахха Бүлүү улууһугар ыытыллыбыта.